仲以為大戶屠牛，誰知淡友又一次中伏，A股午後回勇，帶動恒指挾高，收市升325點，重上23,000點關，成交回升至527億元。表叔話，本來諗住上周五A股高收為翌日三中全會召開造勢，點知落空；尋日咁升法，遲係遲咗啲，惟有寄望今日會議結束兩地魚缸繼續來個升市贈興。

中電新能源高溢價配股引入實力股東，但股價能否再進一步，仍有待觀察。(資料圖片)

徽商銀行（03698）及博雅互動（00434）都在今日掛牌，由於博雅的認購反應熱烈，相信掛牌初期有一番炒作；至於徽商行，大戶抽飛打擊信心，加埋重慶銀行（01963）都未上番水面，睇怕守得住招股價都算有交代！

物流板塊選擇有限

四條一光棍節網購銷情火爆，刺激科網股做好，騰訊（00700）升2%、金山軟件（03888）及網龍（00777）分別升7%及9%，講起光棍節，今年見到電商與實體店不再對立，而是合作無間，互惠互利，透過電商網上交易平台購買實體店貨品照樣有折，電商按交易額坐享分成，實體店亦可藉此開拓更多客源。其實，物流業亦係得益者，只是環顧港股基本上冇咩選擇，也許要等明年阿里巴巴上市，帶起相關配套股份估值，才是來港掛牌的好時機。

新能源股方面，中國電力新能源（00735）宣布，向中國能源建設集團廣東省電力設計研究院配售2億元人仔新股，將用作投資於發電及綠色能源項目，每股作價約0.59元人仔或0.75港元，較公布前五個交易日平均價0.398元溢價約88%。有大型國企以高溢價入股，難怪尋日一開市股價即裂口高開，見0.455元，只可惜係一步到位，全日高位在0.46元，收報0.45元，升11%。

今年上半年，中電新能源賺1.57億元人仔，同比增長27%，主要受惠風電發電項目限電情況緩解，以及光伏發電和新建水電項目發電產生收益所致。截至六月底，其手頭現金及等值為23億元人仔，同比下跌14%，而中期資本性支出為7.83億元人仔，故是次以高溢價配股集資兼引入實力策略股東，消息誠屬正面。

不過，論走勢，呢隻股一向唔易炒，今年首季高見0.58元後反覆回落，上月低位僅0.36元，跑輸同類股。技術上，尋日一口氣重上250日線之上，10日剛抽穿50日線，只是即市跟進暫時冇咩「積蘇」，能否延續升勢，都係兩睇，畢竟現價計預測市盈率約13倍，估值中規中矩，會唔會好似舊年翻版，操盤大戶臨年尾先至開波炒一轉，不得而知。短線至少要企穩250日線0.435元樓上先至有得諗，否則都係做旁觀者最自保。