二手成交呆滯，但係上個月嘅額外印花稅（SSD）成交按月多咗5.3%去到齊頭100宗，連跌三個月後出現反彈；而且持貨唔夠半年，要忍痛畀樓價15%最高稅率嘅SSD成交，仲激增3倍去到4宗。劉Sir認為都係投資者見勢色唔對急走！其實就連鰂魚涌太古城個價都跌緊，呢個藍籌屋苑王，再有兩房則王跌穿700萬元。

太古城兩房則王出現至少三宗低於七百萬元成交。(資料圖片)

十月份額外印花稅（SSD）宗數與涉及稅款

稅務局發言人同劉Sir講，上個月錄得嘅住宅物業買賣入面，印花稅署確定有100宗係SSD成交，比九月多咗5.3%，涉及稅款都多咗3.4%至1,840萬元。最特別係，持貨唔夠半年轉售個案有4宗咁多，按月激增3倍，涉及稅款約150萬元。

其實目前個市靜過鬼，但係SSD成交反而多咗。劉Sir睇怕都係班投資者開始腳軟，趁早出貨斬纜離場。

太古城累減百一萬

好似鰂魚涌太古城咁嘅指標屋苑，個價都麻麻哋。中原張光耀講，例如泰山閣中層F室，建築/實用面積675/582方呎，最早開過800萬元，最後減到690萬元賣出，建築/實用呎價約1.02萬/1.19萬元，係呢類兩房則王近排第三間賣低過700萬元；而有個金楓閣低層B室，建築面積過千呎，都減成200萬賣1,200萬元，建築呎價都係一萬元多啲！

近排二手成交叫價都回落成百萬，該行話，西灣河鯉景灣安曉閣高層A室，六月到依家減足120萬賣600萬元，實用呎價約1.14萬元。美聯講，荃灣爵悅庭西爵軒中層C室，劈價3次減100萬至賣到730萬元，實用呎價約1.01萬元，低市價約3%。名采策略都話，北角樂嘉中心1座低層B室賣660萬元，低市價10%。

第一城低市價5%沽

藍籌屋苑一減再減，美聯講，沙田第一城28座中層C室，低市價開650萬元，再減15萬至635萬元賣咗，實用呎價約9,230元，低市價5%。