美元終於出現久違了嘅反彈，美匯指數落到去79，再急跌嘅機會已經唔大，不過講轉勢都仲係太早，始終市場焦點都仲係想知道美國聯儲局退唔退市。嚟緊嘅退市步伐，大家都仲評估緊十月政府停運對經濟衝擊有幾大，所以美金要轉勢都仲未係時候。

紐元兑美元走勢

不過，睇美元之餘，記得留意埋隻紐元。前個禮拜加拿大央行自一二年四月以嚟，首次透露放棄加息嘅訊息，令紐元成為最明確有加息訊號嘅外幣。不過，我哋知道，新西蘭加息背後嘅目的，都係想壓抑當地熾熱樓市。

新西蘭央行已經雙管齊下，自十月一日開始當地銀行新批按揭中，最多只可以有10%嘅申請者做九成按揭，目的係增加置業者買樓成本。早前央行副行長Grant Spencer就講過，央行嘅做法目標係確保樓價不斷上升唔會對經濟造成更廣泛嘅影響，但都需要一段時間先見到效果，情況有少少似香港嘅雙辣招。

由於澳洲央行行長剛剛先話現水平澳元匯價可能出現顯著貶值以增加競爭力，紐元仍然係商品貨幣中最好。短線見0.8220有初步築底機會，不過未確認已完成調整，仍有機會測試0.8100至0.8150，建議吸納紐元，目標先睇0.8390，止蝕於0.8050。