美國民主共和兩黨的黨爭肥皂劇落幕，聯儲局未有耐退市，港股寄望全部落在即將召開的三中全會身上，昨日魚缸水盡鵝飛，大市成交縮到得450億，是九月廿三日以來最奀，恒指跌60點，報23,189點。港匯顯示，近期資金沒明顯流出迹象，不過，基金經理在不同板塊中輪轉的頻率就愈來愈高（簡單講炒得短癮），唔係日日睇住個市的，根本好難捉到手影。

太陽日誌2013/11/5

恒指未能重返高位

趁個市悶悶地，不妨退後幾步去想，美國次按爆煲、雷曼倒閉，於金融市場掀起骨牌式連鎖反應，最終聯儲局透過連番量寬收拾殘局，推高資產價格刺激投資的再膨脹計劃。近幾個月聯儲局對退市前言不對後語，似乎仲想繼續直升機撒銀紙之際，近期華爾街三大指數中，兩個先後創歷史新高。反之，雖然有港元與美元掛鈎的資金氾濫優勢，但港股並未完全承接美股強勢，自○八年低位10,676點反彈，去到一○年高位24,989點後，輾轉快將三年，但港股依然未能重遊舊地，在16,000至24,000點之內浮浮沉沉，二月至今恒指四次上試23,500至24,000點仍舊無功而還。

從歷史角度，20倍PE以上的港股算貴，10倍樓下叫平，現時一三年預期市盈率11.1倍，是靠近低端一方，主因是近年恒指加入了國企為成分股，而當中重磅的內銀估值又屢創新低所致（國指一三年PE僅7.9！約是歷史平均的三分之二）。內地經濟硬着陸的風險溢價，很大部分已計入港股估值內。過往，超賣或超買的極端估值，僅會有短暫時間出現，市場很快會自行調節，作出修正，但今時今日卻往往是持續一段頗長時間（去年底至恒指PE介乎8.8至12倍之間）。中國經濟前景的不明朗性，已成為長遠困擾港股的結構性問題。

超市百貨股可冷敲

俗語話炒股唔炒市，其實撇除一些受經濟氣氛影響的大型中資巨企，今年唔少股票表現仲係相當理想。最近有美資行舉行上市公司高管與基金經理的大型會議，踏入第四季，基金經理最有興趣的公司類別，殊不意外，是一眾內地互聯網及手遊公司，其次係一孩政策醞釀調整下受惠的乳業及嬰兒奶粉股，兩類都是絕佳的抵禦經濟逆風選擇。

比較有趣的是，沉寂多時的體育用品及零售消費類別公司，例如安踏（02020）的接單量止跌後，紛紛從低位回升，當中零售消費尤其係超市百貨股，除高鑫零售（06808）之外，大部分股價近年低處未算低，似乎鍾愛高賠率冷門股的，可以搵時間做吓功課。

滙控（00005）尋日收市後出季績，第三季列帳基準稅前溢利45.3億（美元．下同），按年升30%，母公司股東應佔利潤32億元，升28.1%，業績稍稍差過市場估計。睇過幾間大行的即市評論，簡單講營業額比大行估計低1至3%左右，成本佔收入比例及淨利息收入都差過預期，唯獨撥備比估計少，一級資本比率升至10.6%，改善幅度快過預期。

總括而言季績麻麻，但今年以來滙控股價走勢落後於歐美銀行股，勝在夠平，相信亦係季績後股價在倫敦市先跌後回升的主因。而教筆者稍稍失望的是，滙控仲未有準備增加派息甚至回購先兆。