二手樓市靜到震，連向來有收購重建價值，隨時可以升價幾十倍嘅唐樓，都要減價出貨。深水埗就有樓齡超過五十年唐樓，兩個月內減20萬，以235萬元賣咗，實用呎價4,434元，呎價平過公屋，新買家獲銀行估足價，仲做埋七成樓按。其實唐樓好租，太子有「戰前」唐樓套房，有外籍客貪佢夠舊，以每月約6,000元承租，實用呎租約30元。

深水埗福華街有逾半世紀舊樓錄減價出貨。（資料圖片）

二手樓減價成交個案

兩月削廿萬 銀行估足

富榮地產陳振文同劉Sir講，呢個位於福華街雙號嘅高層唐樓單位，實用面積530方呎，九月都叫255萬元，但心急業主見個市係咁落，就一直減價，十月減到去243萬元，仲肯包約6萬元維修費，而到近排再減到235萬元終於賣咗，原業主累減20萬，實用呎價都係4,434元，仲有大型銀行估足價，做埋七成按揭，以唐樓計都算罕有，個原業主好似自住開，個單位約五年升值123萬元。

陳氏又話，呢個新買家估計係投資者，除咗博重建收購之餘，又可以做套房，改4間房每間估至少租到3,000元，回報都去到5厘幾。

貪古色古香 老外租住

其實唐樓套房有市，基隆街單號有幢「戰前」唐樓，樓梯都用木造，全幢有9間套房，近日中層實用面積約200方呎套房，加埋逾100方呎大「騎樓」，畀外籍客每月6,000元租咗，實用呎租約30元，就貪佢夠「古色古香」。

收租有着數，相反樓價升唔起，業主賺得少。中原講，沙田御龍山9座低層C室，減32萬賣868萬元，建築/實用呎價約7,233/9,283元，揸貨近四年帳面賺49萬元；另將軍澳領凱10座右翼高層A室，連減三口價30萬賣530萬元，實用呎價7,887元，啱啱兩年帳面升得34.4萬元；連埋使費，估計只係近平手。

另一方面，其實好多細價樓買家都肯畀雙倍印花稅（DSD）入市，祥益話，天水圍嘉湖山莊樂湖居14座有個高層單位，早前減13萬，以382萬元易手，新買家再畀17.19萬元DSD。