本欄讀者或者近期好想鬧爆筆者，事關整個十月都只係識叫人等破位追勢。查實唔經唔覺，恒指在22,640至23,554點之間914點上落快將接近兩個月，大市自六月低位19,426點，升到九月十九日高位23,554點之後，也牛牛皮皮足足個半月，最弊係睇好或者睇淡的大孖沙，都唔見積極進攻的意圖，令每次當逼近上落區上下限時，想賭破位的炒家都損兵折將。

恒指期貨走勢

退後一步，其實今年恒指多次在兩萬四關口前受阻，由二月開始，先後在23,944、23,512、23,554及23,534點高位掉頭，從樂觀角度，八、九月指數兩次逼近阻力區，未有太大調整，低位承接一點一點向上移，也是不爭的事實。如果將這幾個中期阻力點延伸起來，頸線在23,477點，和上周五恒指收市23,249點，僅差228點距離，可以預期，一旦突破，整個運行一年的上落市，可能以大型頭肩底形式完成，以19,426點低位計，量度升幅可達27,528點，即使是量度五成升幅，亦已可見25,502點，這不難解釋，何以近日大市每次逼近23,000點，都是阻力重重。

在預期破位後有至少兩千點目標，筆者也唔介意等確認轉勢訊號，避免再陷入上落市的死胡同，上周五晚美股高收，估計期指今早開23,300點機會唔細，剩下來只看大戶到底有多大決心了。