上季賣地計劃最後兩幅住宅地會喺今個星期五截標，壓軸登場就梗係有番咁上下分量。其中毗鄰粉嶺高爾夫球會嘅上水青山公路限量地，不單係上季規模最大嘅住宅用地，仲係區內十幾年以來首幅住宅供應，測量界朋友都覺得幅地反應會唔錯。加埋同日截標嘅荃灣青龍頭限量地，估計兩幅地皮可以為庫房進帳最多約27.75億元。

上水限量地佔地約15.4萬方呎，投得財團須興建不少於515伙。

荃灣青龍頭限量地早前獲城規會通過放寬發展密度。

兩幅限量住宅地資料

今次截標嘅上水限量地位於青山公路－－古洞段，係上季賣地計劃規模最大嘅一幅。

劉Sir話畀大家知，以「住宅（丙類）」而言，呢幅地發展密度確係幾高，地積比率達3.6倍，總樓面約莫55.5萬方呎，限定提供最少515個單位。

老友高緯環球張翹楚話，嚟緊截標嘅上水地皮位置唔錯，雖然地積比率較一般新界住宅地高，但其實問題唔大，政府推出嘅地皮發展密度愈加愈高，市場都習慣咗啦。不過規模愈大，發展商要承受嘅風險就會相應增加，佢估計每方呎樓面地價約3,700元，估值大約20.5億元。

上水地景靚涉515伙

劉Sir都知道，呢幅上水地皮個景又真係幾好，享有高爾夫球場景致，相信截標反應會幾熱烈，韋堅信測量師行林晉超都話，上水地皮個位係偏遠啲，不過環境唔錯，相信唔少發展商都睇好新界東北長遠發展，預期今次截標財團參與度會幾高。綜合市場資訊，呢幅上水限量地涉515伙，估值介乎15.6億至22.2億元，樓面呎價就由約2,800至4,000元。

青龍頭地近豪景花園

至於同日截標嘅青龍頭限量地，早排都獲城規會通過放寬發展密度，地積比率由原先2.1倍增至2.52倍，總樓面約13.2萬方呎，須提供最少175伙。

張翹楚話，地皮位置同景觀都唔太差，但係隔籬嘅豪景花園到依家都仲有貨，呎價亦貼近市場，對地價或多或少會構成壓力，佢估計樓面呎價約3,400元，估值約4.49億元。