尋日有消息指申銀萬國（00218）母公司同A股上市公司宏源證券合併，刺激申銀股價一度急升13%，並帶旺其他券商股，第一上海（00227）逆市升近3%，收報0.69元，即市高見0.73元，啱啱破位應該有得諗。

望吓業績，第一上海中期扭虧為盈，錄得純利2,185萬元。今年港股成交額回升，佢嘅金融服務業務自然好景，期內企業融資及股票經紀分部錄得營運溢利3,638萬元，比去年同期增加17%，而證券投資分部亦賺1,426萬元，去年同期則蝕571萬元，不過其餘三個分部（物業開發、物業投資及酒店、直接投資）中有兩個仲係見紅。走勢上，股價喺今年初成功掂到一一年八月高位0.98元，之後掉頭插番落去，用咗四個月由5毫子邊爬番上嚟，走勢一浪高於一浪，依家處於七月延伸至今的上升軌，PB唔夠0.4倍，後市應該仲有追落後空間。

第一上海（00227）

阻力位： 0.75元

支持位： 0.62元