個人遊攻陷銅鑼灣，又一間老店被專攻內地人的商戶踢走，喺景隆街5號地下一間開業廿年嘅果汁店，新業主商舖投資者黎永滔早排重整租金，大幅調升上址月租金至10萬元，加幅達十九倍，老店頂唔順貴租已遷出，而新進場商戶喺同內地旅客生意最密切嘅找換店，新租金回報率達約6.6厘。

銅鑼灣景隆街有老店被專攻內地人的商戶踢走。（資料圖片）

商舖投資者黎永滔

近年銅鑼灣老店不敵加租遷出個案

投資者黎永滔同劉Sir講，大約一年前以約1,800萬元購入上述景隆街5號地舖，可能舊業主同個租客係老友，所以租金好耐冇加過，佢話：「依家我都係跟市況嚟調整，同街全港「舖王」由找換店租緊，月租金約18萬元，呎租約3,600蚊，我今次加幅都好溫和。」

景隆街全幢計劃重建

黎永滔話上址面積約50方呎，由新全記鮮菓租咗約廿年，之前月租金只係5,000元，趁租期就到才加租，佢曾提議以每月6萬元續租，不過，果汁店都話唔會續租，後來代理話找換店有興趣，好快就以意向月租金10萬元租出，每呎租金大約2,000元。

劉Sir計過，若果汁店留低，以平均每杯賣約廿蚊計，每日最少賣超過160杯至夠交租。

黎永滔仲話，未來日子會將上述景隆街5號全幢，同隔離7號顯輝中心全幢一併拆卸重建，興建一個面積近4,000方呎嘅巨舖。事實上，近年銅鑼灣有唔少老店都被踢走，好似原本由利苑粥麵專家租用逾四十年的同區駱克道539號地舖，因不敵業主加租，今年初已搬出，新租客係歐洲名錶，新租金每月接近80萬元，較前租金升1.6倍。

大道西巨舖漲租逾倍

有代理報料，西區皇后大道西雙號一個由家居日用品店租用嘅巨舖，面積近4,000方呎，啱啱畀另一商戶以每月約20萬元搶租，呎租約20元，新租金升超過1.1倍。

此外，聽講有化妝品店今年初租用旺角登打士街一地舖，早前突然唔租，業主曾經減租兩千，但市場無反應，近日決定再劈8,000蚊，即時有小食店以每月約9.2萬元承租，新租金減8%。