隔晚美國議息未有結果，道指先升逾百點，因為華爾街預咗聯儲局短期退唔到市，本來昨日港股朝早開高之後，仲係牛牛皮皮，到下午A股愈升愈有，好友在期指結算日先來一招攻其不備，大市以接近全日高位收市，升457點，報23,304點，主板成交升至608億元。

恒指期貨走勢2013/10/30

早前筆者已提出，恒指跌穿大位22,743點，居然行得100點左右，去到22,640點已經行人止步，死唔斷氣的味道極濃。好嘅唔靈醜嘅靈，好友連續設計兩個走勢陷阱，昨日先來大收割。三日之內，恒指輾轉返到22,743至23,554點橫行區的高位。

資金繼續由跑贏大市的基金愛股，回流到大落後的內銀股身上，是觸發昨日挾倉市的主因。此外，港匯轉強，昨即市高位見7.7525，資金有流入港元區的迹象。而昨日所見，內銀及內險股等統統追落後，國指的雙頂延伸阻力位在10,753點，如果升穿，見11,000點樓上機會唔細，破位追勢，決定睇番十一月國期。