Fundman睇市：通天酒業 小注無妨

尋日提到踏入第四季中，有迹象基金資金轉移，從今年升得誇張的科網、濠賭及乳業股，轉飯鑊捧番大落後的內銀股，中（03988）工（01398）建（00939）農（01288）再下一城，昨升幅介乎2.2至2.7%，國指亦因此升幅比恒指更大，達2.4%。

中資金融股受追捧

內銀外，今年內險股一樣無乜睇頭，年初至今，國壽（02628）、平保（02318）及太保（02601）股價累跌18.1%、6.5%及3.5%，僅財險（02328）有13.3%進帳，如果四揀一，筆者一定挑平保。

早前平保的第三季度業績急升1.55倍，賺54.29億（人民幣．下同），已經教通街睇淡內險的炒家為之側目，當然有死硬派會堅持因為去年比較基數低所至，今首三季累積賺233.3億元，已去到街外平均預測243億的九成五，短期勢必令大行作出重估。

或者有人唔太睇重，但筆者留意到業績中最艱難的部分，平安銀行首三季都有20%按年增長，息差擴闊，各方面營運數據都比大行估計理想，如果破九月中高位61.2元（港元．下同），今浪見65至66元，仲係相當保守的假設。

內地股債市近期表現麻麻，或者投資收益方面，短期難有提升，長遠也可能受市場開放競爭影響，不過一三年市盈率13.3倍（重估後應更低），處於近四年13至34倍區間之下限，股市對宏觀環境困難心裏有數，短期市場搵落後股，可以搭一搭順風車。

另一隻季績喜出望外的股份是大唐發電（00991），第三季盈利按年及按季升1.5倍及88%，好過大行預測，緣於燃料成本跌幅比估計大。展望第四季，削上網電價及煤價開始站穩陣腳，業績應該無第三季咁勁，但以8倍預期市盈率及3.6厘股息，即使明年業績持平，估計短期股價應該可以從容地在3.4至3.8元之間上落。

睇CNN新聞，話今年法國及阿根廷兩大紅酒生產國葡萄失收，預測全球及歐洲紅酒產量會倒退5%及10%，創上世紀一九六○年以來最低紀錄，反之紅酒文化盛行，環球飲家與日俱增（增長主要來自美國及中國）下，紅酒消耗量估計今年約有1%升幅，令供求呈大約3億箱缺口。

本地酒股選擇有限

自中國嚴打貪腐，紅白酒（葡萄酒及茅台）當水飲的豪氣不復再，近年多以來，法國名莊靚酒酒價通通玩高台跳水，今次會否借短缺炒翻一轉？看來機會唔大，一來靚酒講年份，二千年後幾乎隔年都話好年，有充足存貨，反而普羅大眾飲的紅酒仲可以諗諗，只可惜股份選擇真係唔多，王朝（00828）做咗「長停公主」；揸住長城的中國食品（00506）酒業收入比例唔高；通天（00389）連續兩年半業績無乜起色。不過咁，隻通天淨現金有9.7億人仔，已經超過本身7.8億元的市值，睇番十月初股價橫行打底後，近期級級上，細細注玩吓實在無傷大雅。