由於早前美國聯邦政府停擺，加上前兩次議息會議都調低了經濟增長預測，如今幾乎已無人再估明年三月前美國有「吉士」退市。華爾街等候一連兩日聯儲局議息會議結果，睇吓有無收水時間表公布，前晚十年美債息在2.5至2.52厘窄幅上落，美股三大指數變動唔大，整體觀望氣氛濃厚。

太陽日誌2013/10/30

綜合大行預測農行業績（人民幣）

近排內地錢荒拖住中港股市級級落，尋日人行終於出手，兩星期以來首次推130億人仔七日期逆回購操作放水，令一個月Shibor終止六連升，回番0.315厘，收6.162厘，然而隔夜至兩星期拆息仲未肯掉頭，加埋市場認為逆回購中標息率4.1厘偏高，顯示水緊情況仲未完全紓緩，港股由最多升過173點去到22,979點，之後隨A股急瀉，一度倒跌見22,760點，尾市滬綜指跌幅收窄到5點，港股先好番些少，收22,846點，升39點，成交不足600億。

網股熱隨時急冷卻

藍籌股中以騰訊（00700）最傷，跌3.3%，拖低恒指51點，事緣係前晚美國上市的搜狐（SOHU），收市後公布第三季蝕6,500萬美元，遠差過預期，拖累收市後電子交易大插16%。短期中國網股熱會唔會因而被打窒，仲要睇埋尋晚百度（BIDU）份成績表，但可以肯定，唔嫁又嫁想番香港掛牌的阿里巴巴股東們，見咁嘅形勢肯定愈嚟愈心急。

管道燃氣係內地經濟吹冷風下，少數仍可維持強勢的行業。中國燃氣（00384）發盈喜，預告九月底止半年業績比去年有強勁增長，昨日收市升4.3%，報8.87元，以分析員預測一四年盈利增長大約兩成，每股賺44港仙計，市盈率20倍，以增長條件唔算好貴，如果有機會見返8.5元樓下，吸引力會更大，加埋新奧（02688），是筆者兩隻長期心水。

尋日內銀股全線向好，農行（01288）最標青，升3.16%，中（03988）工（01398）建（00939）升幅則介乎2至2.6%。睇到市後解畫，認為係人行逆回購消息所致，筆者相信這只佔部分原因，其他原因包括已公布第三季季績普遍好過大行估計些少；徽商銀行（03698）未上市先興奮，幾個基礎股東「圍晒飛」；另外有唔少今年升得勁的基金股，好似濠賭、乳業、科網、電訊硬件等熱門股，明顯見芬佬沽貨食胡手影，好似蒙牛（02319）、合生元（01112）、網龍（00777）、騰訊、金山（03888），銀河（00027）及金沙（01928）都散散哋。

要知基金係唔可能清倉揸住現金等收爐，要搵地方泊住啲錢，故今年無乜炒過、市值夠大兼且市盈率平到暈的內銀股，肯定是不二之選，尤其已經公布季績，短期進入消息真空期，勝在夠晒安全。