新盤大增賣樓優惠，戰線亦由西九龍蔓延到港島西。揚言「月月有盤推」嘅新地（00016），繼九龍站天璽後，尋日話稍後會緊接推出西環Imperial Kennedy，仲話周內會開價同開放示範單位，首批會有50伙。

新地雷霆（左）稱，Imperial Kennedy周內會開放示範單位。右為新地代理胡致遠。

以佣金高來促銷的薈臻，售樓處昨日早上逼滿地產代理。

主要新盤最新情況

雷霆：或推稅務優惠

新地副董事總經理雷霆話，天璽最後一批單位會响星期六賣埋，緊接就到Imperial Kennedy，首批會推50個單位，積極考慮為買家提供稅務優惠或者港人港樓條款，而今個星期稍後會開放三房示範單位同交樓標準戶畀客睇。新地代理助理總經理胡致遠就話，Imperial Kennedy有161個單位，近一半係兩房戶，而物業有4層做咗會所。該盤昨更新發展項目的平面圖。

至於永泰地產（00369）嘅西半山懿峯，最快周六賣61樓B室連裝修戶，講緊定價7,290萬，同時加咗一百五十天同一百八十天兩個長成交期計劃，但樓價要畀多4%同6%。至於尋日宏安地產嘅西營盤薈臻開賣就暫時未發市。而今日第二輪發售嘅西鐵柯士甸站THE AUSTIN，公布抽籤揀樓次序，樓盤登記約1,650個。

另外，信置（00083）嘅觀塘觀月．樺峯收票逾150張，嚟緊周五發售90伙，市值逾7億元；同系賣咗唔夠一個月嘅大埔海鑽．天賦海灣累計成交有61伙，套現咗超過14億。

英皇西環項目明年售

亦有發展商部署明年才推新盤，英皇國際（00163）執行董事張炳強話，近排發展商加優惠市場都有承接，而旗下兩個未推新盤西環干諾道西180號同屯門小欖項目，估計最快明年發售，另餘下約20至30個貨尾會唔會調整價格要睇市況。永義國際執行董事官可欣話，旗下目前無貨尾，但全新項目太子道西313號雋瓏，最快出年三月推出。

代理生意都有起色。利嘉閣總裁廖偉強同劉Sir講，公司今個月佣金收益約1億，係三月至今首錄盈利，一手買賣佔六成，但人手回落至約2,700人。中原陳永傑話，本月全月佣金料約1.6億元，比上月多兩成。