內地又掀錢荒，上周港股連跌四日，周五恒指跌137點，報22,698點，終於失守運行超過一個月，22,743至23,554點的橫行區支持。

恒指期貨走勢

客觀因素，港股上周五的確弱，一來，周四滙豐編制的中國製造業PMI勝預期，投資者不為所動，當日恒指已偷步跌了164點。周四晚，道指先跌後回升，ADR預示港股周五向好，但23,500點破關不成的大市，反最終連跌四日，合共740點。

筆者一直堅持破位追勢的策略，到上周五確認破位，但最後收市一刻，只敢以平日三分一注碼入市，原因係周五大市雖然跌穿50日線22,761點以及22,743點上落市的下限，不過即市於22,640點已經停步，以一個運行超過一個月橫行區，破位後只跌唔夠100點，未見好友蜂擁止蝕推低大市的情況發生，慎重起見，都係睇埋今日市況較穩陣。

上周五美股以接近全日高位收市，升61點，報15,570點，新加坡場外莊家開價又番到去22,770點附近，如果今日22,743點可以順利收復，破位引發急跌的預期，可能又要落空。而最怕亦都無得估的，係內地拆息連抽多日之後，本周阿爺會否出手，來一個逆回購令個市死貓彈。