港股上周先高後低，一連跌穿10日及50線，主要係內地「水緊」影響氣氛，唔少人見恒指一直未能突破23,500點水平，索性沽貨鎖定利潤。

內地3G市場持續擴大，作為「土炮」手機龍頭的中國無線成為受惠者。（資料圖片）

本周二美國聯儲局會議，相信「退市」機會唔大，周三乃港股期指結算，料此前市況持續偏軟，加埋IPO活動，大市交投可能轉靜，而A股表現將成後市風向儀，特別是過去有不少例子顯示，每次內地進行大型改革（盛傳今次三中全會將啟動的重大改革包括深化土地制度改革、加快對外開放、及深化社保體制改革等）後，雖可為中長期增長奠下基礎，但短期股市多數冇運行。今次會唔會有例外，且拭目以待。

強勢股轉弱響警號

除政策風險因素外，近期見到強勢中資股轉弱勢，亦不得不察。典型例子有長城汽車（02333），上周五其A股跌停，H股上周五曾低見43.8元，收報45.05元，跌7%，參考年內前兩次調整，每次都要跌穿50日線，14日RSI落到接近30先到尾聲，目前其50日線處42.5元，14日RSI處49.8，幾時先好撈貨，大家心中有數。

兩大中資電訊股中移（00941）及聯通（00762）派咗季度成績表，今日輪到中電信（00728）。中移季績遜色，股價由85元水平跌至一度插穿80元關始初步喘穩；至於聯通，季績雖對辦，惜遇上跌市，股價偏軟。其實，呢兩年論業務發展及收益增長速度，聯通勝於中移，在芬佬眼中這個結論應該冇異議。不過，今年以來中移有得炒吓，全因憧憬內地於年底前發4G牌照，但結果由中秋講到十﹒一，依家都只聞樓梯響。今年尚餘僅六十多天，也許會令淡友沽空中移有戒心，但論增長潛力，二選一，阿莊都係捧聯通場。

姑勿論如何，兩大電訊商3G業務佔比持續上升，且趨勢持續，得益的當然是智能手機製造商。在「土砲」智能手機市場佔龍頭席位的中國無線（02369），旗下3G酷派智能手機今年上半年銷售收入達到93億元，同比增長50%。公司截至六月底止中期賺2.1億元，同比增長39.6%，並已宣布擬更名為「酷派集團」。

上周其股價由3.1元跌至2.8元水平，14日RSI已回落至33。公司業務定位同市場增長前景都唔差，現價一三及一四年度預測市盈率分別為13倍及10倍，中長線有可為，可趁是次調整浪，留意2.5至2.7元水平承接，捕捉分注收集機會。以一四年預測市盈率12倍計，合理值3.4元，2.3元水平未宜有失。