近幾年傳統工業區新建寫字樓租售價吃香，唔少原本諗住活化做酒店嘅工廈，都轉軚改裝做寫字樓。香港經貿商會會長李秀恒（Eddy）持有嘅4個工廈活化項目，其中首個改裝做寫字樓嘅葵涌項目，剛命名為KC100，依家推出預租，意向呎租約28元。佢話幢樓總投資約11億元，如果以意向呎租租出，租金回報可以有6至7厘。

李秀恒（中）預期，KC100寫字樓活化工程可於明年第四季竣工。

KC100寫字樓活化項目加入不少現代化、環保以及藝術氣息元素。

李秀恒旗下4項工廈活化最新情況

變身寫字樓 命名KC100

尋日劉Sir去咗KC100命名會，Eddy話自己唔係地產商、發展商、炒家，亦唔係投資者，只係迎合香港轉型大環境，將手持物業改裝增值。上述KC100個名同地址有關，由於物業喺葵昌路100號，大家一講就知喺邊度。物業現址原本叫運通製衣大廈，原本諗過活化做酒店，後來認為物業四面向街，內籠間隔較適合做寫字樓，加上附近有新建商廈，唔少租客同買賣都係國際大企業，所以最後拍板改裝寫字樓。

佢話物業早喺一○年以約4.5億元購入，為咗唔想幢大廈咁死板，所以加入唔少現代化、環保同埋藝術氣息元素，所以改裝費超過6億元，即總投資約11億元。

另一方面，Eddy旗下公司金寶集團營運總監游傑智話，KC100現均原先工廈租金只係每呎約8元，若以意向水平租出，租金回報可以有6至7厘，較舊有租金升幅超過2.5倍。物業樓高12層，總樓面約30萬方呎，9層為寫字樓，兩層為零售樓層。

黃竹坑道酒店涉340房間

Eddy仲話，葵涌寫字樓需求前景一片光明，公司喺區內嘅金山工業中心原本計劃活化做酒店，現在計劃改做寫字樓，並準備短期入方案。

佢都認為，酒店業前景亦不容忽視，黃竹坑道39至43號酒店活化項目，改裝費每方呎約3,000至3,500元，會提供約340多個房間，可望二○一六年招租。而油塘榮山工業大廈巨無霸改裝項目，包括酒店、商場及食肆等，總樓面約55萬方呎。