近日美股出奇咁樂觀，可見絕大部分投資者，根本不把美國債務違約的可能性放在眼內（連薩默斯都咁講）。正因為九成九賓架唔當十月十七日死線係一回事，但正所謂︰唔怕一萬至怕萬一！一九二九年十月廿九日，道指重挫13%，一九八七年十月十九日，道指單日錄得23%跌幅，到○八年美國次按危機，又係十月，道指一個月之內跌掉27%。儘管八七股災已經講緊讀書時代，印象模糊，不過一到十月，總有多少心緒不寧，既然賭場日日開，唔爭在等多兩日，睇埋美國黨爭點收科至算。

太陽日誌2013/10/16

綜合大行預測海通證券業績（人民幣）

辣招唔撤地產股腳軟

前晚美股先跌後拗腰倒升收市，樂觀的氣氛也影響港股，恒指並無受中國九月出口數據差勁影響，尋日升118點，報23,336點。新地（00016）補貼買家DSD及BSD，九龍站豪宅天璽貨尾即賣個滿堂紅，仲玩到加價加推，特區政府見狀，表明辣招唔會撤銷，免得樓市炒風復燃，地產股即時腳軟，尚幸尋日滙控（00005）及友邦（01299）兩隻金融股貢獻大市47點，抵消地產股對恒指的影響。查實尋日個市幾鬼悶，期指都係得三萬五張成交，創今個月新低，期指炒家在未知美國開大開細前，都揀靠邊站。

尋日午後小插曲，有份申請免費電視牌的幾隻股份統統被掃高，原因係話五點三政府開PC宣布發牌，傍晚結果一出，社交網站即被洗版，見唔少人戥魔童不值。其實唔單止電視迷跌眼鏡，睇睇尋日香港電視（01137）3.22億成交額，反觀另外兩隻獲發牌股份，成交加埋都唔夠9,000萬，可見連股市賓架都捉錯用神，賽果有幾冷門可見一斑。香港電視揸住23.1億淨現金，差不多每股2.85元，變賣家當（寬頻及長途電話生意）等做電視大亨的魔童何去何從？相信電視迷同尋日買錯股的勇士最想知答案。

內地股市一個最特別的地方，是監管當局與政府可以因應市況，隨時要新股IPO活動煞車。回顧自一九九○年A股市場誕生以來，IPO（新股發行）八次被叫停，拉閘最長一次，正是去年十月「十八大」至今。最近平安證券因為上市保薦工作問題，被勒令保薦生意停業三個月，直到十二月廿三日，陰謀論者即刻從罰期推算IPO重啟最快會係平安夜。儘管是捕風捉影，不過近期的確多咗大行推測，今年三中全會前後A股IPO市場會重開。

睇番券商股今浪升得唔算多，買番多少倉底，即使IPO重啟無着落，但首三季業績已大翻身，目前估值應可企得穩，正係進可攻退可守。三隻券商股中信証券（06030）、海通證券（06837）及銀河證券（06881）之中，純睇估值或者會揀潛緊水嘅銀證，但結合較多大孖沙捧場的因素一併考慮，史提芬仲係睇好首九個月淨利潤增長7.3倍的海通多啲啲。