政府早年話要起動九龍東，過去一年帶動區內工廈租金都升咗超過一成，而屬區內工廈少數租戶之一嘅藝術團體，開始「頂唔住」貴租，轉租火炭、葵涌及荃灣等租金相對平啲嘅工廈，同埋租番細啲樓面，計起上嚟可減少近三成至五成租金支出。聽講有個原本租開觀塘工廈單位多年嘅油畫研習班團體，月前轉租火炭國際工業中心中層戶，月租5,200元，每月慳番4,400元，支出比之前低差唔多46%。

葵涌華達工業中心近期有專營音樂練習室團體承租。

不少藝術團體紛進駐葵涌華達工業中心。

近月藝術團體搬出東九轉租個案

部分呎租接近20元

有代理同劉Sir講，依家觀塘同九龍灣工廈空置率偏低，一成都唔夠，業主點會唔趁勢加租，所以租金約一年間升超過一成，部分呎租更高近20元。區內藝術團體一向唔算多，大約只佔約5%，佢哋為咗慳多啲，唔少已轉租火炭、葵涌及荃灣等租金較相宜嘅地區，反而令到該類團體目前佔該三區比例，增至約3%。

靠近東鐵站嘅火炭工廈租金相對較高，呎租閒閒地約15元，反而區內桂地街一帶相對較遠嘅工廈，由於租金較便宜，因而有唔少藝術團體捧場。代理話，上述開設油畫研習班嘅團體，原本租用觀塘成運工業大廈高層戶，面積約600方呎，月租約9,600元，呎租約16元，租約月前完結後，決定轉租桂地街2至8號國際工業中心中層戶較細單位，面積約400方呎，月租只約5,200元，呎租約13元，支出減少約46%。

轉租葵涌慳租45%

唔知啲藝術團體係咪鍾意湊熱鬧，葵涌區工廈近排多咗唔少該類團體進駐，收到風有間專舉行音樂練習室嘅團體，早排轉租華星街8號華達工業中心低層戶，面積約600方呎，月租約6,600元，同原本租用嘅觀塘駱駝漆大廈約700方呎嘅中層戶租金比，每月慳番約5,300元，租金開支減幅約45%。

另有個陶瓷訓練班團體由於學員數目減少，月前轉租荃灣白田壩街嘉力工業中心中層戶，新舊地方面積都約700方呎，不過新址租金開支少約27%。