呢排個市好難炒,一來波幅唔算大,二來美匯指數已經喺重要支持79.5附近爭持,但美元捱打嘅情況又未出現改變。

歐元兑美元走勢

如無意外耶倫將接替伯南克個位,美元短線又繼續弱勢,市場解釋話耶倫繼續寬鬆政策的機會大,但呢個理由似乎唔夠紮實,始終聯儲局唔係玩個人主義,最主要都係睇數據做人,所以市場對聯儲局下一步退市嘅預期唔會變。

不過話個市難炒係,連世界上最大嘅外匯對沖基金FX Concept今年都損失達15%,管理嘅資金由○九年最高峰的120億美元,縮水到唔夠7億美元,由此可見今年匯市大上大落,並唔係Buy and hold而係hit and run,尤其係大家對美元長線進入由跌轉升的轉角市,正如大家對股市係咪牛三都有唔同睇法。

短線美元仲未有條件大升,一眾外幣仍有機會藉美元弱勢而再試高位,尤其係短線一眾外幣都未有壞消息出現,但中線每個國家都各有隱憂,呢個係筆者中線睇美元升嘅原因。

其中歐元近日表現呆滯,自從伯南克話唔退市,一舉升穿六月同八月高位1.3420後,大部分時間都係喺1.35水平徘徊。短線有點高不成、低不就,區間明顯喺1.3450就有支持,所以如果有機會跌至1.3450短線買入歐元,都係一個唔錯嘅做法,目標放喺今年二月嘅收市阻力1.3650,升穿呢個位,今年二月高位1.3710相信唔難再升穿,止蝕應該放喺聯儲局九月議息會時嘅起點1.3360,以90點子博超過200點子,可以一試。