美國總統奧巴馬意外地否決共和黨提出的臨時調高政府債務上限六個星期方案，意味本月十七號國債觸頂談判，計時炸彈仍在倒數中，有人認為奧巴馬玩火，拉共和黨玩膽小鬼遊戲，睇吓邊個懸崖前先煞車。

太陽日誌2013/10/15

綜合大行預測龍源電力業績（人民幣）

事實上，咪以為美國總統真係地球上最有權力的男人，近排財政上限爭拗，可見華爾街賓架同債市玩家，先係美國總統及國會的幕後老闆，今次順水推舟，用個市逼共和黨就範，接受奧巴馬的醫改，絕橋也！但當全人類都相信美國債務違約僅屬笑話一則時，奧巴馬今鋪玩到咁大，個市唔地震都幾難。

今次港股升浪，緣於內地第三季經濟數據有好轉趨勢，但隨住九月份極醜樣的出口數據曝光，估計會成為今日港股的一大攔路虎。中國九月出口意外地按年跌0.3%，比經濟師預期的6至7%增長差一大截；而上月通脹3.1%，跟國家3.5%的通脹目標又走近一步，意味即使第四季出口唔掂，人行投鼠忌器之下，短期貨幣調控可以鬆手空間有限。周一A股唔跌，令筆者有點意外，但今日港股平開甚至開低的機會相信唔細。正所謂十個牛皮九個淡，近期恒指窄幅上落近半個月，如果再落番23,000點樓下，真係要小心個市係時候來一次似樣的調整。

私人派對無謂參與

大摩隻雲遊（00484）超購大爆燈，都特登唔用上限定價，留晒水位畀班對沖基金炒短線，果然造就新股市場熱番晒。上周五，六隻新股齊發成為一時佳話，三隻八字頭離晒譜，毅高（08218）收0.96元，比上市價0.6元升60%。御藥堂（08185）唔止變首飾箱，直頭可以變夾萬！以近全日高位2.79元收，比上市價1.07元升160%。港深聯合（08181）收2元，更係比上市價0.33元高506%。

值得一提，三隻均屬全配售私人派對，一開出第一口價，已分別比上市價高2.5倍、87%及2.2倍，就算心口有個勇字都未必夠膽跟，總之好睇唔好食，都無謂衝入去做大戶點心。

出口數據奇差，今日個市會點反應？筆者個人唔多樂觀。阿里巴巴確認唔揀香港上市，祖國網股依然不為所動，睇嚟已經由影子概念、睇住阿里巴巴估值愈估愈高去推動，變成有少少自動波泡沫。賓架老友仲話會一直癲到Twitter上市！信唔信自己決定。講到比較實在，兼具故事配合嘅相信都係新能源股，近日大孖沙密密吸風電、光伏及替代能源股，博十一月三中全會有相應扶持政策推出，實行buy on rumor，sell on fact。

一時被反壟斷纏擾而急挫，一時又因國家補貼而抽升，筆者對光電股整體是恨多於愛，加埋對保利協鑫（03800）猶有餘悸，順風光電（01165）又配股抽水，真係怕咗佢。唔想太冒險，揀番業務實實在在的，不如睇番經營風場的龍源電力（00916），上周啱啱升穿近三個月橫行區高位8.63元，睇番一一年股價曾經在8.5元見頂回落，阻力變支持，可以此為止蝕，博三中全會前向10元樓上推進。