早幾年荃灣路德圍食肆開完一間又一間，最癲嗰陣，十間舖有七間都做食肆。不過，今年初起政府嚴打區內店舖阻街，加埋再多一條行人天橋月前開通咗，「分薄」晒街上人流量，約半年間吉舖數目差唔多增加到15間。有代理話，依家業主叫租已比數個月前為低，但仍無人吼。

荃灣路德圍現時吉舖大幅增加，不少業主都調低意向租金，求盡早租出。

代理點睇
金城黃逸羲指商戶承租意欲低，路德圍吉舖情況短期難改善。

商戶心聲
何先生表示，路德圍人流減少，不少食肆商戶已經陸續遷出。

荃灣路德圍吉舖減租情況

金城地產代理黃逸羲（Kim）同劉Sir講，路德圍店舖數目超過70間，食肆數目佔最多，高峰時期，潮式打冷店、甜品店同埋粉麵店等佔整體差唔多七成，舊年有食肆為咗搶租「靚位」，都唔介意每月約10萬元承租，呎租近200元，嗰陣吉舖數目5間都無。

吉舖大增弊過沙士

Kim話，不過自今年初起，政府多咗巡查同檢控店舖阻街，老實講唔少食肆都將枱櫈擺街，所以佢哋影響最大，生意大減，依家路德圍吉舖增加到15間，○三年沙士時都無咁誇張，睇怕嚟緊會仲多。

依家唔少業主都降低意向租金吸客，其中路德圍有個雙號地下單號舖，面積約莫1,000方呎，食肆原先以近16萬元租用，六個月前租約滿就搬走咗，業主曾叫租每月約19萬元，近排終於軟化減租，依家意向月租約16萬元，減幅約16%。

不過，所謂「屋漏兼逢夜雨」，連接荃灣港鐵站至荃灣大會堂嘅行人天橋，今年初起陸續開通，有該街道商戶埋怨條街行人無以前咁多，尤其係落雨天同中午時分，生意最受影響。

減租16%仍乏承接

有食肆負責人同劉Sir講，「以前政府睇得無咁緊，我哋都會偷雞擺幾張枱櫈出街做生意，所以租金貴啲；但依家生意差，租都賺唔到。」佢仲話，隔籬單號地舖原本係由特色小食店租，面積約800方呎，吉咗約三個月，業主依家叫租每月約15萬元，呎租約190元，同之前意向租金減咗約16%，但都未搵到租客。