美國財政爭拗無解決迹象，美股好似食咗瀉藥一樣，隔晚道指再跌159點，收報14,776點，接近八月低位14,760點。華爾街明顯冇之前咁坐定粒六，VIX恐慌指數再升0.93去到20.34，進一步逼近六月高位21.91。尋日港股並無預託證券跌得咁厲害，要多得白宮放料，話總統奧巴馬最快尋晚提名現任聯邦儲備局副主席耶倫女士，接任聯儲局主席一職。

太陽日誌2013/10/10

綜合大行預測安踏業績（人民幣）

奧巴馬政府對財政懸崖及聯儲局換阿頭兩個不明朗因素，趕住二除其一，是否意味着奧巴馬打定輸數，十月十七日美國財政懸崖前共和及民主兩黨之爭解決無望？股市點睇，尋晚美股表現應可知一二。

汽車股續可持有

港股日升日跌，藉美股大插，尋日恒指低開176點後，全日低位浮沉，收市跌144點，報23,033點。在美股明顯轉弱，道指及標普五百指數跌至重要支持位下，尋日港股已算跌得少。美股由九月中累積跌6%，反觀港股由23,554點至今只回吐2.2%，恒指由低位升勢持續近三個月，緣於六至八月內地經濟數據有復甦迹象，九月數據陸續出籠，今日會公布內銀新增貸款，基於短期內地數據可能不及第三季初強勁，港股能否繼續無視外圍動盪，這將是第一重考驗。

美國局勢唔明朗，大孖沙落雨收柴，繼私募基金CDH沽掉華地國際（01700）後，高盛亦將手上5.78億股吉利汽車（00175）清倉。上周吉汽至由4元樓下，炒上4.54元至批，昨收4.26元，高於上板價4.15元，接貨客仔仲可以皆大歡喜，真係要寫個服字。由於去年同期基數低，今年第四季內地汽車銷售增長可以維持，揸住車仔股應該仲可以等埋未來兩三個月銷售數據至睇位食胡。

尋日有唔少跌市奇葩，盛傳黃金周賣樓賣到滿堂紅，碧桂園（02007）再升1.9%，其他內房股全線向上，雅居樂（03383）升3.3%，龍湖（00960）升2.6%，世房（00813）升2.5%，越地（00123）升2.2%，有迹象內房升勢，由一線擴散到二線股。

如果過去半年，揸唔到內地科網、電訊或者乳業股，只要手上有安踏（02020）、李寧（02331）、361度（01361）、匹克（01968）等幾隻體育用品股，投資表現應該都可順利跑贏大市。體育用品股同上面提過嘅幾類增長股唔同，炒嘅係火鳳凰概念，好似安踏上個月的訂貨會，分析員就估計訂單會有中至高單位數增長。

安踏由六月低位升近八成一，一四年PE約17.1倍，開始回到合理範圍，近期升得有啲急，不妨食一食胡等回吐。遲吓撈底可諗吓李寧，一來市值只及安踏三分之一，私募基金同體操王子的財技，似乎都唔止值呢個價，況且蝕緊錢即係未來業績有較大幻想空間，如果落番去6.3元樓下，可以諗諗。