幾年前政府起動九龍東效應，區內寫字樓供應量連年上升，上季空置率更爆升至6.3%，創一○年第二季後超過三年嘅新高，有代理估計，今季區內寫字樓租金有機會罕有出現回落，跌幅約1至2%，將會抵銷今年頭三季升幅。查實近排區內已經有寫字樓出現劈租吸客，有啲減幅超過18%，唔少成交呎租低市價約10至17%外，個別仲創埋新低。

東九龍部分商廈成交呎租低市價10至17%。

美聯許少娟表示，東九龍寫字樓租金下跌暫未能刺激租賃成交。(資料圖片)

近期東九龍寫字樓減租及低市價租賃成交個案

劉Sir翻查戴德梁行資料，發現上季東九龍寫字樓空置率已升到約6.3%，按季多0.4個百分點，係一○年第二季錄到11.2%空置率後嘅新高。

建生嗌低18%終租出

美聯商業助理區域營業董事許少娟話，唔少企業都唔擴充，甚至縮皮，租金走勢「雪上加霜」，估計觀塘及九龍灣本季寫字樓租金將會下跌約1至2%，勢抵銷今年首三季嘅累積升幅。

劉Sir收到風，觀塘敬業街建生商業中心依家放租盤超過20個，為求突圍而出，該廈有個中層戶業主調低意向租金，由月前呎租嗌約22元，降低到約18元後即租出，減幅逾18%，月租金約10.26萬元。隔離嘅皇廷廣場都有低市價租金成交，該廈中層一個面積約1,900單位，啱啱以每月約3.23萬元租出，呎租僅約17元，低市價約17%。

其士呎租低過18元

東九龍大量寫字樓租盤殺埋身，租金「低處未算低」，消息稱，九龍灣其士商業中心一個中層戶早排唔使2萬元租出，呎租低過18元，較該廈一般呎租約21元，低約14%，亦創該廈呎租新低水平。

另外，雙倍印花稅出招半年幾以來，工商舖市況愈來愈差，香港置業工商舖一份報告話，今年第二及三季整體工商舖成交加埋唔夠3,200宗，總值約369億元，比起過去十年同期季度平均數，宗數就大減超過52%外，仲係咁多年同期嘅歷史新低。

另市傳百佳依家租緊嘅觀塘瑞和街地舖傾緊續租，上址市值月租約35萬元。