政府為減低屏風樓嘅影響，近年已經「撳低」多區住宅發展地積比率，但為咗解決住屋供應問題，有關規範已經變相「鬆綁」。劉Sir收到風，地政總署向城規會申請放寬本季賣地計劃兩幅屯門限量地嘅密度，住宅地積比率由分區大綱圖許可最多嘅5倍，大增兩成去到6倍，估計額外新增約170個住宅供應。

地政總署建議加大兩幅屯門限量地發展密度，料額外增加約170個單位。圖為屯門良德街地皮。（資料圖片）

以提高發展密度等方式增供應的住宅地

劉Sir知道，地政總署啱啱向城規會提交規劃申請，建議放寬上述屯門震寰路與良德街交界、以及良德街兩幅限量地嘅發展密度，以增加單位量應付迫切住屋需求；擬議將兩地住宅地地積比率由5倍增至6倍。

每座料可起多6層

最新總樓面約20.08萬方呎及15.62萬方呎，提供約373個以及290個平均面積約538方呎中小型戶，比起未放寬前多約96及74伙。

要加大發展密度，建築物高度亦難免要增加，呢兩幅限量地都計劃興建2幢分層住宅。其中震寰路地皮高度由100米（主水平基準以上．下同）增至115米，層數則增加6層去到32層；至於良德街地皮層數增至30層，亦多出5至6層。

雖然兩地皮單位數目多咗，但唔代表今季整體供應因為咁而增加，接近政府消息人士同劉Sir講，兩幅屯門地額外增加嘅170伙，早就納入咗本季賣地計劃提供約3,300伙嘅計算範圍入面。

兩地最新估值6億

老友高緯環球張翹楚都話，兩幅地皮加大地積比率後高過大綱圖許可其實係錯覺，只係近年屏風樓問題促使政府「撳低」多區地積比率，規劃署制定分區大綱圖都會參考《香港規劃標準與準則》資料，並維持震寰路與良德街兩幅限量地估值每方呎約3,000元。

此外，兩幅地皮折合最新估值約6.02億元及4.69億元，比放寬前多出1億及0.79億元。根據該準則，位於新市鎮嘅「住宅（甲類）」用地，最高住宅地積比率可以去到6.5倍。