前晚美股偏軟，道指跌49點，報15,401點。儘管再無新利淡消息，十年美債息亦由早前高位接近3厘，回到2.7厘，但華爾街仲係畀「十月可能退市」的預期困擾。本以為九月期指未平倉合約臨埋單發力，上周五升至11萬張，斷估本周結算，將淡友趕盡殺絕的機會高唱入雲，殊不知港股一連兩日反高潮，尋日恒指連10日線都失守埋，收市跌192點，報23,179點。值得注意，左右大局嘅幾隻重磅股，包括騰訊（00700）、滙控（00005）、中移（00941）、中海油（00883）及中石油（00857）均跌穿10日線，由此推斷，八月底開始的挾倉潮，可能告一段落。

太陽日誌

綜合市場預測和電業績（港元）

奶粉股成熱炒對象

傳國家預備大灑銀彈扶持內地乳業，半隻國企的蒙牛（02319）創完歷史新高後偏軟，倒跌0.5%收35.45元。資金轉炒奶粉股，雖然雅士利（01230）未復牌，但合生元（01112）就炒上59.2元創歷史新高，收市升5.3%報59.5元。尋日法巴唱好，睇好合生元的「媽媽100」網分銷平台，認為潛在併購機會及新產品即將推出，為股價及業績提供上升空間，目標價由53.5元調高到70.5元，算係外資行中唱得最好一間。雖然本周掛牌的輝山乳業（06863）不在傳言國策扶持名單內，但配售部分熱鬧，據聞大行內暗盤叫緊2.75元樓上先有沽盤，入咗飛應可安心等派彩。

蘋果公司公布新作iPhone5s及5c開售三日累計賣掉900萬部，破iPhone紀錄。講開iPhone，兩間有份分銷的本地網絡商和電（00215）及數碼通（00315），都趁新iPhone推出，將跟機的無限數據月費計劃取消，分析員認為對兩間公司的客戶平均消費有拉動作用，但相信效果要較長時間浮現（兩年合約續期的客戶，短期可能會先揀2GB以下月費計劃慳錢），可能因為咁，尋日和電股價無起跌，數碼通則有0.7%進帳，報10.62元。

數碼通早前業績，意外地減派息，畀唔少捧場客及芬佬鬧爆，據知管理層無向分析員提供滿意解釋，點解唔等錢洗之下突然將派息比率降低，坊間的陰謀論認為，主要是早前幾間電訊公司同特區政府就一六年強行收回三分一3G頻譜再攞出嚟拍賣鬧得僵有關，係真係假只有當事人至知。姑勿論點，數碼通同和電，兩個月內先後被基金清洗，短期要彈番上去業績前水平真係唔易，但近日因為美國退市步伐可能比預期慢得多，美債息高位有見頂迹象，諸如房託基金一類的高息資產開始見支持，加上兩隻電訊股取消無限數據月費計劃，變相加價，再跌空間應十分有限。睇番和電同數碼通一四年預期派息率其實唔錯，分別係6.05及5.97厘，而筆者仲傾向和電多少少。