新一輪大盤開售潮即將爆發，部分發展商趁現時空檔先行搶推貨尾盤。好似恒地（00012）繼上周減價重推九龍城曉薈之後，昨又接力推出九龍大埔道曉尚50伙嘅價單，平均實用呎價16,465元，普遍單位比新例之前直接減價約7%。不過，買家可享優惠就比新例前大幅「縮水」至佔樓價約6%，喺此消彼長下，計落折實售價同之前相若，反映發展商對區內樓市好有信心。

恒地林達民估計，市場已經累積大批購買力，稍後將會逐步釋放。(資料圖片)

曉尚重新推售安排

恒地營業部總經理林達民同劉Sir講，市區新盤需求殷切，集團為咗回應市場所需，尋日重新推出曉尚50伙嘅價單，本周六以先到先得形式發售。而今次推出嘅單位售價比起新例前調低咗，但係優惠亦相應減少咗，所以折實售價其實同之前無乜分別。

迎海．星灣仍待批預售

林達民又話，曉尚喺新例生效前已經賣出咗20幾個單位，成個盤依家仲有110幾伙可以賣。對於近排樓市成交量保持偏低，佢估計，市場已經累積咗大批購買力，嚟緊將會逐步釋放番出嚟買嘢入市。

他稱，旗下一直部署喺今年內開售嘅烏溪沙迎海第2期迎海．星灣，依家仲等緊批預售文件。

曉尚推50伙 入場441萬

睇番曉尚嘅新價單，今次推出單位分布7至35樓，最低入場費係12樓C室，單位實用面積僅267方呎，售價441.4萬元，呎價16,532元，相比新例前價單嘅售價474.6萬元，今次減咗價約7%，同其他單位減幅相若。發展商今次向買家提供4種付款方法，六十天成交期可享樓價7%的最高折扣，同新例前維持一樣，選用二按計劃可享嘅折扣，就由之前售價5%略增至6%。

雖然售價表面減咗。不過，曉尚今次提供優惠就比之前「縮水」，價單見到，發展商今次只向買家提供價值5萬至13.8萬元嘅禮券同埋成交價共5%嘅回贈，優惠佔樓價共約6%，恒地會員買家如果直接透過恒基物業代理購入單位，額外可獲首二十四個月管理費優惠。

資料顯示，曉尚係今年四月新例生效前推出總值最多佔樓價約13%嘅優惠促銷，所以今次優惠比之前削減咗約7%，正好同減價幅度相若。