美國聯儲局爆冷唔退市，令美元即時受壓。不過，炒咗足足一季嘅退市論仲未炒完，而聯儲局官員嘅言論又再影響市場情緒。上周五有投票權嘅布拉德就話「唔退市」係因為近期經濟數據較預期稍差，令佢哋可以再等等。

歐元兌美元走勢

當中樓市數據相信係一個重點所在，今個星期又有新屋銷售等數據，如果真係比預期差，就進一步強化市場對下次會議上減少買債嘅規模唔會好大嘅預期。就算退市都只會減買國債，但購買抵押按揭證券MBS嘅規模就肯定唔變。因為債息持續向上乃大趨勢，對樓市造成嘅壓力將愈來愈大。

到目前為止，市場基本上已經消化晒聯儲局將以溫和步伐退市，但筆者認為依家入市真係要好小心。第一，再次強調九月係多事之秋，唔退市後接住可以炒嘅不明朗因素就到美國國債上限到期，所以唔適宜大手入市。第二，最好就畀少少耐性，等接近吸引嘅技術位先埋位入市。

眼下形勢就係，由薩默斯唔玩所做成嘅裂口，可以話已經補咗，即係短線美元係有壓力，外幣佔咗上風，歐元亦升穿六月同八月阻力1.3420，短線已經重新成為支持，阻力就今年二月高位1.3700。