被指為一三年全球最勁風暴的天兔，靜悄悄落波，真係歌仔都有唱，「天氣不似預期」。港股一樣估佢唔到，上周四、五美股因退市預期復燃而急跌，以為港股至少都有300點以上跌幅，點知開市前九月滙豐中國製造業PMI初值報51.2，比八月的50.1大幅改善，亦勝過分析員預期的50.9，A股借勢炒上，港股早市跌幅遠比預期細，埋單跌130點，報23,371點。

太陽日誌

證券行預測蠟筆小新業績（人民幣）

連串內地經濟數據比預期理想，瑞銀把中國第三季GDP預測，由7.5%調高升至7.7%，睇埋美銀美林、花旗及德銀幾間大行，最近都分別調高到7.9%、7.8%7.9%，比對上一次預測提升幅度介乎0.2至0.4%，李克強全年保住7.5%個「底」，問題應唔大。不過，港股自六月最低點19,426點，輾轉番去上周23,554點高位，升咗21.2%，利好因素短期有可能反映得八八九九。上星期講過，來自不同基金消息來源，都話本月首兩三個星期，內地數據唔及七、八月般強勁，數據到十月中至曝光，投資者要小心挾淡倉潮玩埋九月底十月初，大戶隨時掉番轉頭嚟玩。

果汁股乏投資價值

內地傳媒指三隻香港上市內地果汁股，匯源（01886）、安德利（02218）及海升（00359），都有從果農處收集變質變壞或未成熟就掉落的「瞎果」，製作果汁及濃縮果汁，報道一曝光，雖然立即遭否認，但匯源仍跌4.9%報4.22元，安德利仲未復牌幸免一跌，海升則原地踏步。報道提到向果農買「爛生果」之後用消毒劑沖洗，再直接榨汁，就算真有其事，其實都唔會太令人吃驚，就算先進如美國，今日大部分漢堡扒、腸仔、炸雞塊等，都係起肉後的剩餘物資，再用離心機剝離經殺菌劑清洗的「人造肉食」，核突過爛生果榨汁多多聲。不過，論到三隻果汁股的盈利能力，真係無乜投資價值，只能偶然靠收購消息，燒一燒冷灶。

講過隻天喔（01219）收乾晒等開車，睇嚟去到3.4元樓下承接力唔錯。另外見幾隻副食品股近期都蠢蠢欲動，康師傅（00322）由上個月的18.3元上番22元，統一（00220）由上月底6.6元起步去番7.98元，雖然中期業績之後唔少分析員睇淡，話內地方便麵價格戰仲會持續一段日子，之不過，康師傅及統一始終今年累跌唔少，加埋原材料好似棕櫚油及PET膠粒等，第三、四季價格可望平穩，毛利率應至少維持上半年水平，中期業績一枝獨秀的旺旺（00151）更加唔使講，股價從上月低位10.1元去番12.46元，差些少就掂到12.52元歷史高位。

論到估值最平，要數蠟筆小新（01262），產品除果凍外，仲有棒棒糖、朱古力等甜食，及豆腐乾等烘焙小食，半年業績賺1.87億元人民幣，升16.1%，主要係第二季開始推出乳製飲品，提供額外貢獻所致，假設全年維持同等升幅，盈利3.22億人仔，以45億元市值，市盈率僅11倍，約為旺旺30倍PE的三分之一。雖然偏低估值反映一定風險溢價，但在內地副食品股升浪中，此股仍有值得小注一試的條件。