本港豪宅新盤用料同設計愈來愈「豪」，近排積極拆售車位套現嘅信置，本周六就會發售九龍塘逸瓏嘅車位，呢個車場用料堪稱非一般咁講究，罕有地引入咗大型水晶燈飾，就連地台同牆身都採用雲石等石材鋪砌，簡直就似酒店一樣，首批118個售價約120萬至150萬元，上周六至今暫錄得逾80個登記。

九龍塘逸瓏車位用料講究，除配備大型水晶燈飾之外，牆身及地台均以石材鋪砌。（資料圖片）

逸瓏推售車位概況

事實上，逸瓏自從入伙以嚟，唔少參觀過屋苑嘅地產界人士，都讚賞呢個酒店式停車場。劉Sir日前就有幸親身參觀呢個超豪停車場，果然體驗到發展商由設計以至選材嘅心思，相信成本比起一般屋苑高出唔少。就現場所見，車場內嘅照明系統相當之非一般，竟然設有大型水晶燈飾，而地台同牆身更加唔係一般停車場採用嘅普通石屎物料，全部都用雲石等石材鋪砌裝飾。

定價平過新界 周六賣

市場人士講，逸瓏車位比例充裕，整項目只係提供120伙，但車位數量就有137個，所以，屋苑車位用料同成本雖然較高，但定價就唔算太進取，首批118個車位每個售價只係約120萬至150萬元，相對部分新界一手屋苑嘅車位售價仲要低。例如同系下月拆售嘅烏溪沙站上蓋銀湖．天峰273個車位，每個售價就要約146萬至166萬元。

據講，逸瓏唔少業主都擁有不止一部靚車，所以都希望購入兩個或以上車位，但發展商首輪銷售只限每名業主最多可購1個車位，上周六起接受業主認購登記，暫已錄得逾80個登記，明日截止登記，本周六開售，目前該屋苑每個車位月租金額約3,500元。

Austin傳批售下月推

市場人士又話，信置除咗部署連環拆售車位外，同系大埔海鑽．天賦海灣最快日內開價，項目近排開放現樓單位都吸引咗大批有興趣嘅準買家參觀，估計最快月底至下個月有機會開售。至於會德豐地產同新世界發展等合作嘅西鐵柯士甸站The Austin，消息透露已經批出咗預售文件，最快下個月登場。