執筆時，仲未知天兔會唔會為放完三日中秋假的香港打工仔，帶來多一日抑或半日額外假期，不過睇見華爾街股市響港股休市期間的表現，揸重貨過市嘅可能情願個市早開早着，免得夜長夢多。

太陽日誌（２０１３／９／２３）

新意網往績（港元）

上周五道指急跌，個市反應咁大，說穿了，跟華爾街考慮到聯儲局不退市的背後原因，不無關係。自五月伯南克提出退市可能性後，美債息急升超過1厘，牽連按揭息口也大幅飆升，美國資產再膨脹，製造財富效應以抵抗經濟萎縮的威力大減，即使一眾鴿派委員出來唱反調，也無法令市場想法逆轉。

港股料有下調壓力

直到議息，聯儲局已把今、明兩年的經濟增長預測調低，今年由2.3至2.6%，降為2至2.3%；明年由3至3.5%，下調至2.9至3.1%，債息先見高位回落。史提芬深信，今日美國要徹底退出量寬唔易，加埋個市又驚開始十月國會傾國債上限，今個星期估計個市都會波動到極，唔明朗環境下揸錢係基金經理金科玉律，尤其美股處於今年相對高位，唔走就笨。以預託證券推算，港股今日如能順利落波開市，至少要開低一巴仙，返到23,200至23,300點之間。

美債息短期可能見頂，一眾房託基金（REITs）紛紛報復式反彈，早個多星期史提芬講過，置富產業信託（00778）在美國推QE前與美國十年債息息差大約1.2厘計，市場似乎把過大風險折讓加諸置富身上，以上周四收市價6.51元，預期息率回落至約5.57厘，比十年美債息2.73厘高2.84厘，若息口預期由過分樂觀回到中性，置富及一眾REITs，應仲有水位。

今日想提一隻比較冷門的收息兼高息股新意網（08008），今年股價表現比跌近6%的控股公司新地（00016）更理想，升了46%。八字頭加埋個名雖令人諗起科網投資，但查實佢係收租股，主要透過旗下互聯優勢，從事數據中心租賃，現時在柴灣及荃灣擁有兩個數據中心，並於去年向新地租用沙田一物業，作為新數據中心之用。

新意網今年六月底止全年純利5.3億元，升17.9%，剔除物業公平值重估，每股基礎盈利10.07仙，按年同步升23%，股息政策則維持全數派回股東，以現價2.33元計，息率4.32厘，與房託基金比較或者較低，但卻高於大部分上市收租股。

新意網並無借貸，持有超過15.7億元現金及有息證券投資，相當於股價近兩成九。在增加樓面再出租及財政上，靈活度要比有較大限制的REITs優勝。保守估計，今年每股盈利及派息再升一成左右，預期息率4.75厘，值得留意，五月一眾REITs跌得較新意網為多，短期基金從死貓彈的股份堆搵食，未必即刻搵「跌得少」的新意網，但作為一隻增長型收租股，等REITs第一輪反彈結束，不妨諗諗換入新意網。