近期不少藥房睇準機會進擊一線街舖，有代理計過，過去約六個月藥房已分別喺旺角、尖沙咀及銅鑼灣搶舖，涉及最少有15宗，租金被搶高逾六成至兩倍不等；其中，尖沙咀東海商業中心地下一個原由日式連鎖食店租用舖位，分間成5個細舖後，其中3個都畀藥房租咗，個別呎租高約255元，較前租約平均呎租高出超過2.1倍。

原由日式食店租用的東海商業中心一個地舖，分間後大部分由藥房租用。

過去六個月藥房搶租核心零售區舖位個案

近排來港內地旅客嚟香港掃多咗化妝品、藥物等日常用品，香港置業置尊旺舖營業董事林偉文同劉Sir講，限奶令今年生效至今超過六個月，內地客買奶粉數量冇跌過，最重要係藥房最賺錢嘅貨係藥品，同埋保健產品，內地客繼續掃貨，藥房自然大把銀彈喺一線街搶舖。

尖東舖間細 呎租255元

尖沙咀東部酒店雲集，內地客自然多，正正喺百周年紀念花園對面嘅東海商業中心，門口人流熙來攘往，有代理話，連鎖壽司店「板前壽司」創辦人鄭威濤等揸住嘅該大廈地下7至9號部分，原由連鎖日式食店租用多年，月租金約22萬元，租約舊年底前屆滿，業主之後分間上址為5個地舖，大部分500方呎唔夠，其中3個俾藥房租咗，其中一個約490方呎舖位以每月約12.5萬元租出，呎租約255元，比起該舖前租約平均每方呎約80元，升咗超過2.1倍。

銅鑼灣核心街舖呎租全球最貴，不過，藥房無有怕，照樣喺區內搶舖，代理話，該區波斯富街77至83號地下部分，面積約200方呎，原本由手袋專賣店租用，月前俾藥房以每月約35萬元租咗，呎租1,750元，比之前租金升咗超過80%。

至於不夜天嘅旺角，區內一個原本由電訊公司租用嘅西洋菜南街5至7號地下部分，因不敵貴租而搬走，早排亦畀藥房以每月近70萬元承租，以面積約470方呎計，呎租約1,490元，新租金升幅超過80%。