尋晚兩點，一連兩日的聯儲局會議將有結果，除預期中的退市規模大小之外，仲會首次披露一六年聯邦基金利率預測，看官手執報紙時，估計已知道答案。筆者無水晶球，但大致都估到，仲有唔到半年任期的主席伯南克，即使着手減少買長債壓低長息的力度，但好大機會會維持短期利率前景不變的預期，對經濟前景估計也傾向溫和，實行繼續「維穩」安撫金融市場，免得債息過分波動，影響經濟復甦。

太陽日誌

摩通預測新地業績

尋日港股靜到暈，等聯儲局議息，基金大條道理撓埋對手，實行唔做唔錯，恒指跌63點，報23,117點，主板成交縮到501億元，是接近三個半星期最奀。入股搜狗後騰訊（00700）未好過，尋日再跌3.9%，報402.4元，一隻股票拖低恒指57點。

現時港股只差1.6%，就去番五月高位23,512點，相比下國指較弱，尋日跌62點，報10,588點，差6.8%先番到五月家鄉11,361點，如果唔係一堆重磅內銀股，早前因發優先股集資獲開綠燈，可能仲更加落後。賓架界傳九月內地經濟數據，好可能及唔上七、八月咁好，一來re-stocking旺季過咗，亦有傳聞話九月上旬發電量增幅，會比七、八月同期明顯放緩，消息堅定流？到十月自會水落石出，歸根究底，今浪港股因內地經濟數據反彈，由六月低位炒上嚟，在這樣的傳聞揮之不去下，唔多唔少都影響氣氛。

唱淡樓市一味靠嚇

關於樓市，尋日仲未講完，話說近排好多有頭有面之士，話雙辣招會令港樓價兩年要跌五成，誇大成分多於一切，一來筆者深信美國經濟條件及官民負債過高的問題，缺乏大幅加息條件，如果中國經濟不至於陷入極為惡劣的硬着陸環境，要港樓大跌唔易，地產商及代理行依然發出淡過白開水的預警，說穿了都係抱住試試無妨的心態，一味靠嚇，博政府在雙辣立場上軟化，唔好阻佢地搵食。

筆者身邊喜歡買磚頭收租的朋友唔少，問佢哋辣招下會唔會加加碼，十居其九耍手擰頭，相反問佢係咪睇淡到要賣樓套現，一樣予以否定，主要考慮係雙倍印花稅，對買樓收租的打擊唔細，672萬以上物業經已畀7.5%印花稅，以目前租金回報約3厘左右計，閒閒哋租兩年至夠冚印花稅，純益庫房自己一啲着數都無。再者，○九年之後港股不過係大型上落市，恒指在萬六至兩萬五之間浮沉，阿爺話經濟「保底」就升，阿爺話調控就跌，完全係「政府行為」，沽樓套現炒股誘因更低。

早兩日超人話長和系唔會遷冊及撤資，長實（00001）立即發威，升3.1%去到120元超過半年高位。基於地產股目前對比歷史估值處中下限水平，有乜風吹草動，向上機會應大於向下。目前恒生地產股指數市帳率0.84倍，但仲比九七年至今平均的1.18倍，低29%。回顧市帳率低到去0.8倍水平的時期，包括九七、九八金融風暴、○二至○三年的後科網泡沫及沙士期間、○八年初的美國次按風暴、以及一二年至到一三年這段時間，若今浪樓價無出現上述時間的波動，那地產股就有過分被低估之嫌，心水繼續係長實同恒地（00012），至於新地（00016）在積極增加經常性收入下，先放在第三選擇。