外圍經濟前景麻麻，連租金開支相對低嘅乙級商廈，都罕有單位提出頂租，依家灣仔、西環及銅鑼灣呢類放租約莫二十個，返番去○八年金融海嘯時期，有租戶劈租，甚至加佣吸客。好似灣仔皇后大道東中華大廈有個中層單位，租客開出每方呎約20元搵人頂租，同依家租金低超過兩成；西環干諾道西確利達中心，有低層單位租客就維持現租搵頂租，但就調高代理促成佣金到1.5%谷租。

干諾道中確利達中心有單位高佣求租。

灣仔皇后大道東中華大廈，現有個別單位推出頂租。

港島乙廈頂租放盤個案

中區甲級同超甲級商廈經常有頂租單位推出，事關租客退租後，每月可慳番幾十萬至百幾萬元不等。而乙級商廈單位租金相對低好多，每月租金只係2萬至4萬多元左右，佔成本比例唔高，所以頂租放盤唔多。

貿易公司縮皮遷舊廈

不過，以灣仔、西環及銅鑼灣為例，舊年區內乙級商廈頂租放盤只有幾個，不過，近月增至約20個，唔少仲選擇大幅減租或加佣吸客。

劉Sir收到風，喺灣仔胡忠大廈對面嘅中華大廈，一間貿易公司租緊嘅中層單位，租期出年第四季先到，但依家公司已經喺港島東搵緊地方搬，諗住轉租舊式商廈嘅細單位，以降低成本，咁用緊嘅單位就推出市場搵人頂租，意向月租約2.8萬元，呎租約20元，較現時租金低逾兩成。

確利達中心加佣谷租

乙級商廈頂租放盤除直接減租外，部分現有租客用加佣鼓勵代理搵新租客。聽講西環干諾道西嘅確利達中心有低層單位，租期二○一五年先完結，現租客幾個月前已放頂租，月租嗌約1.8萬元，同依家租金一樣，不過佢另加佣至1.5%，希望盡早租出。

不過，市場有啲頂租盤仍然以進取價招租，市場反應麻麻，銅鑼灣怡和街22號一個中層單位，依家月租不足2萬元，現租客意向月租近2.4萬元招頂租，呎租約34元，同依家租金高兩成，有代理估計，個租客可能採取高開低收策略，若新租客還租，相信可以租出。