五月推介過搞生活科技嘅世達科技（01282），尋日公布計劃擴大專利產品的亞洲版圖，包括新加坡及台灣，刺激股價狂飆11.4%，以全日高位0.68元收市，加埋14日RSI回勇，要再見五十二周高位7毫子並唔難，不妨小注怡情。

世達主要從事自動化、生活觸控、安全、能源及通訊方面的高科技產品業務，如電容觸控屏幕控制器及模組、指紋生物識別裝置、無線充電裝置等。蘋果iPhone 5s都係以指紋解鎖作為噱頭之一，可見呢類專利技術有得諗。而世達自從四月獲國家頒授兩項專利證書（FingerQ及PrivacQ）、七月進駐香港兩間零售連鎖店（百老匯及快圖美）後，公司身價已經唔同晒，股價由兩毫子樓下，升到依家7毫子水平，但仲未見一○年上市價0.95元。睇番上半年成績表，期內出售若干投資產生巨大收益、生物觸控產品表現好過預期，令佢成功扭虧為盈，錄得純利6,117萬元，前年同期則蝕2,849萬元。

世達科技（01282）

阻力位： 0.75元

支持位： 0.59元