薩默斯唔做聯儲局主席，即時令美元裂口低開。另外，上周新西蘭央行發放加息訊號，令紐元保持強勢。央行講加息，背後目的似乎係想壓制樓市。其實八月時，該央行已宣布十月起，做八成以上按揭的數量，不能超過銀行新增貸款一成以上。而加息嘅另一面係吸引資金流入紐元，將打擊出口。

紐元兑美元走勢

過去數月每當紐元升到0.81水平就出口術話紐元過強。睇埋隻澳元兌紐元交叉盤，由年初1.26水平跌到四年新低嘅1.12，呢對兄弟國家貿易密切，一國貨幣太強另一個太弱，就會嚴重影響紐元嘅競爭力。依家大佬澳洲央行都仲係傾向行弱澳元政策，紐元雖然基本因素好，抗跌力十足，不過要大升就有少少難度。

紐元兌美元喺短短兩個星期內由0.77升至0.80水平，正正就係五月底開始嘅整固區間，高位阻力喺0.8170，低位支持係六月中嘅0.7680，投資者不妨在這個區間內高沽低買，直至破位為止，建議可於0.8220試沽紐元，止蝕於0.8290，目標先睇0.7920及0.7870。

就算只係想買入紐元收息的中線投資者，喺0.80水平買入值博率唔高，要紐元回落至0.78水平才浮現值博率，反正九月乃多事之秋，一旦避險情緒上升，作為商品貨幣嘅紐元，或者會首當其衝。