香港地寸金尺土，唔好話樓價貴，連租金都貴到嚇死人，就算係一間套房，加少少裝修同家電，隨時可以租到「豪宅」價。好似太子祥發大廈有個套房，短租每個月租成8,800元，呢個價就算租成個單位都無難度，實用呎租近70元，就算港島豪宅都未去到呢個價，更有機會成為套房呎租新高。

太子祥發大廈有套房短租每月8800元，更有機會成為套房呎租新高。

套房月租與個別大型屋苑月租比較

有代理同劉Sir爆料，呢個喺祥發大廈嘅套房，實用面積唔夠130方呎，開放式廚房加個洗手間，包新裝修同全屋電器。業主仲包埋無線上網，早幾日至放租，原本開價月租約8,200元，即時畀一個嚟香港讀書嘅美國學生租咗，短租九個月每個月成8,800元，實用呎租去到成68元。

新移民學生哥爭租

爆料代理仲話，其實近排太子、深水埗嗰頭啲套房不知幾好租，租客好多係新移民、年輕拖友或者學生，貪位置方便，月租一萬唔使，所以搵套房租，搞到成日有客無盤，稍為有啲裝修企理啲，月租都要成5,000至6,000元。

就好似之前同區柏樹街單號唐樓有個套房，實用面積100餘方呎，就算要行成五、六層樓梯，都租咗成5,800元。

再者，今次呢個套房嘅呎租，仲比港島豪宅貝沙灣還貴。就算用同樣嘅月租，租成個單位都得，同區長明大廈低層租盤，實用面積315方呎，月租都係叫緊8,500元。富誠地產林栢榮都話，黃大仙一帶唐樓月租，普遍去到4,000至5,500元，部分租客畀多啲都租到成個單位，好似富祐大廈中層H室，實用面積235方呎，都係租約8,800元。

康怡狠劈一成求客

現時新界區兩大上車藍籌盤，天水圍嘉湖山莊同沙田第一城兩房單位，月租入場費都係8,000及9,500元起。反而啲中價藍籌屋苑平啲租，美聯王偉明講，鰂魚涌康怡花園P座低層兩房戶，以每月1.6萬元放租，業主減租近一成，以1.45萬元租出。