前晚捱更抵夜，（目及）實蘋果公司發布新iPhone，iPhone5C以及iPhone5S同之前流出的規格同外觀一模一樣，果粉失望在所難免，個發布會一完，蘋果股價即時由507美元撻到落最低489美元，而被指主打新興市場的iPhone5C，純睇硬件規格以及定價，要威脅聯想（00992）、中興通訊（00763）與小米等土炮品牌唔易，要內地中低端用家掀起換機潮，機會更係微乎其微。

太陽日誌2013/9/12

綜合大行預測潤電業績（港元）

尋日一堆相關概念股，好似富智康（02038）、瑞聲（02018）、數碼通（00315）及和電（00215），以至炒過有機會代理5C的中移（00941）及中電信（00728），股價通通散晒，證明乜嘢叫做希望愈大，失望愈大。

收市後數碼通出成績表，漫遊收入減少拖累業績倒退17.5%，賺8.43億元，跌幅比中期時的3.4%大，亦差過大行估計的5至10%，重點係末期息22仙，比去年同期53仙大減五成八，連同中期44仙，全年派息66仙，盈利派息率由過去五年介乎94至104%，跌到81.1%，應該同4G網絡投資增加有關，對一隻高息現金牛而言，看來今日難逃一跌。

淡友大戶蠢蠢欲動

港股23,000點樓上阻力唔細，加埋中移及滙控（00005）高位力弱，恒指早市見過23,120點近三個半月高位後回吐，最低落到去22,848點，收22,937點，跌39點，成交707億元，沽空佔大市成交比例反彈上10.15%，淡友大戶又再蠢蠢欲動。

下星期二、三美國聯儲局議息，由十年美債孳息近幾日貼住3厘樓下唔肯回落，退市似乎已在市場預期之內，問題只在於每個月850億美元的買債規模，到底會減幾多？有大行報告話，以明年下半年「全退」的市場預期，九月宣布減少三分之一至四分之一，股市足可承受。

內地經濟第二季見底機會大，前日國統局公布，八月份全社會發電量增長13.4%，至4,987億千瓦時，創今年以來最高增幅。電力股早前因憂慮煤價下滑被迫減電價而大落後，一旦電企營業額恢復增長，睇法就唔同晒。當中又以早前擔心要硬啃華潤燃氣（01193），估值大壓縮的華潤電力（00836）表現至標青，升7%，收報18.84元，計落一三年市盈率得8.6倍，比歷史平均15.1倍，足足折讓四成三。

煤價跌對電企幫助當然大，潤電上半年單位燃料成本減少一成九，單係燃料就慳30億元，抵銷維修、折舊、員工及其他上漲成本有餘。市場估第四季上網電價可能要減3至6%，如果售電量唔升，煤價跌幅又無去年咁勁，電企明年增長會明顯放緩。不過如果售電量回升到雙位數，目前市面對潤電的預測就有點保守，股價估計見21至22元機會唔細。