魚缸Blogger：莎莎國際值得跟進

科技股同iPhone概念股呢期人氣爆燈，嫌悶嘅話不妨望吓隻莎莎國際（00178），尋日以全日高位8.3元收市，升幅2%，適逢下個月係「十．一」黃金周兼護膚品換季，睇番上兩次假期前（五一、七一），股價都由低位6.9元回升，今轉唔知會否升穿雙底頸線8.71元，抑或整多一個三底先至再上，可待回調到8蚊樓下收集較值博。

莎莎係一間一站式化妝品專門店，兼且提供品牌管理同網購服務。參考業績，截至六月底止首季營業額增長兩成至19億元，港澳地區同店銷售增長17%，反映美容產品需求持續增長。雖然公司話次季增長預期將放緩，不過查實係因為基數較高，相信仍能保持雙位數增幅。

另外，星展出報告叫人買，認為佢同海外品牌嘅估值差距仲有收窄空間，加埋喺銅鑼灣開幕冇耐嘅生活概念店，畀佢目標價9.26元，較現價有11.5%上升空間。