尋日中國公布八月份PPI跌幅細過預期，配合出口旺季開始，上游製造業價格壓力逐漸紓緩，陸續有大行開始轉口風，睇第三、四季經濟增長可拗腰上番去7.8甚至8%水平。尋日滬綜指狂升3.3%，支持港股繼續屠殺淡友，恒指再升129點，報22,750點，大市成交增至675億元。

太陽日誌

渣打預測置富產業業績（港元）

有趣是近日熊仔愈劏愈有，反之牛證街貨量一直未見大幅增加，可以反映大部分散戶都享受唔到今次升市，仲要日復一日輸完又嚟賭過，也變相資助大戶繼續挾倉。今日就輪到中國八月工業生產（估升9.9%）以及周日的新增貸款數字（估六至七千億人仔）曝光，即管睇吓會唔會又再超額完成，使中字派升勢火上加油。

維達再博水位有限

維達國際（03331）第二大股東SCA Group Holding BV，提出以每股11港元現金收購，比上星期停牌前溢價38.36%，尋日維達一開已經10.9元，收報10.88元，升36.8%，得番1.1%水位。事關SCA講明繼續營運現狀，亦希望保留上市地位，收購係為SCA其他護理產品品牌進行整合。事實上，SCA唔單止是港人熟悉的Tempo紙巾生產商，本身也涉獵多個紙巾品牌及紙尿片產品，本身揸住維達21.65%，估計今次目標係要攞到50%以上控制性股權。

雖然今次SCA的出價看似慷慨，但實際維達股價在紙漿價升毛利率跌的預期下，自五月份開始累跌唔少，SCA查實只係畀番四月時嘅價錢，以一三年市盈率19.7倍計，比恒安（01044）的27.2倍折讓近兩成八，都買得幾抵。由於維達大股東本身揸住24.69%，按道理SCA應清楚成批貨十拿九穩落袋，先至會出咁嘅價錢，而兩批貨加埋達股本46.34%，只差少少已過半，隨時響街都掃到，11元樓下買去投降雖然有贏無輸，但博加價就似乎有啲不切實際。

退市預期底下，近排防守股及高息股認真慘烈，REITs更係無一幸免。置富產業（00778）下星期將舉行股東大會，表決收購天水圍嘉湖銀座商場，通過的話將令其可供出租樓面大增66.5萬平方呎，相當於現有物業組合兩成七。雖然有晒增長故事配合，但股價一樣級級落，由五月高位8.61元，撻到落尋日見5.95元的今浪新低，累積跌去三成一。從交易資料，趁低息期未完，查實趁早完成上述收購對股東係利大於弊，假設交易在年初進行，半年每基金單位分派大約有4.7%增長。

美債息在退市預期下勁升，上周見2.9厘，由於影響基金估值模型的risk free rate，對收息為主的REITs衝擊可大可小，但似乎已有些少over done。置富○三至○七年次按海嘯及QE未開始時，平均分派息率5.5厘，較期間十年美債息平均高1.2厘，預測置富一三年約分派6.1厘，計入息差，換句話，市場預咗美債息見4.9厘，高於現時2厘，比三十年債息高近1厘，撇除無法量度市場對升息恐懼外，準備退休需要穩定收入的，現水平已可開始分段買吓貨。