內地經濟數據向好，支持A股向上，港股順水推舟，恒指全日高位22,853點，收報22,750點，升129點，成交回升至671億元。國指表現神勇，收報10,528點，升194點，內銀、內險及券商股成升市功臣，民行（01988）升6%，乃升幅最大國指成分股。不過，眼見藍籌股升到去統一（00220）及康師傅（00322），仍須提防呢次升市炒到去下周聯儲局開會前，隨時會落閘放狗，故即使忍唔住手落場參與，都係盡量走短線，好似尋日推介的敏華（01999）走勢對辦，跟進咗兩萬股，今日都會睇位食胡。

資金積極發掘落後板塊，幾隻內地航空股中，以南航值博率最高。(資料圖片)

內地傳媒報道，有關部門正研究降低風電上網補貼，消息拖累新能源股逆市向下，華能新能源（00958）、大唐新能源（01798）及華電福新能源（00816）跌幅介乎6至7%。

內銀長線信心未足

講番內銀股，積極研究發行優先股的消息，成為尋日火爆行情的導火線。事實上，目前內銀股估值仍處於低水平，但價廉冇人吼，皆因投資者擔心內銀的資產質素一旦出問題，話賺錢能力有幾強都冇用。傳聞下月內地將宣布政府審計結果，究竟地方債規模有幾驚人，仍有待觀察，如今內銀研發優先股，雖然可視為一個既能讓內銀股融資但又不會對現有股份價格構成太大壓力的做法，但只聞樓梯響，故阿莊認為，呢一刻無謂作過分憧憬，跟勢短炒無妨，長線吸納則尚未具足夠信心。

國指尋日一度升穿250日線（10,545點），只要周內企穩現水平，其他落後國企股有足夠條件成炒作目標。航空股算係落後板塊，尋日國航（00753）、東航（00670）及南航（01055）升0.3至2.3%。以最近三個月的技術走勢，三者現價離五十二周低位都不太遠，南航累升幅度最少，但14日RSI底背馳卻最為明顯。反正都是燒冷灶，若然想短線買入航空股板塊，南航最值博。

風險因素方面，首要自是地緣政治，要留意敍利亞局勢，一旦再趨緊張刺激油價走高，航空股走勢將受限制。此外，末季內地出口情況對貨運需求影響，以及內部需求持續回暖對帶動客貨運量回升的動力有多大，都足以左右航空股表現。