旺區舖租升唔停，唔少經營多年嘅商戶近幾年都相繼捱唔住要起身，但旺區據點始終有其重要性，所以有部分仍然積極喺同區另覓落腳點。好似國際連鎖快餐店麥當勞餐廳，舊年就因為不敵業主加租，而搬出租用近三十年嘅尖沙咀彌敦道近山林道分店，由於呢段街實在太旺，所以佢哋決定轉租一街之隔嘅彌敦道184號地下連1及2樓，月租約55萬元，比新址前租金升逾80%，面積約7,200方呎，比舊舖只係細咗30%。

銅鑼灣一線街舖呎租全球最高，但無礙連鎖商店續租意欲。（資料圖片）

連鎖店貴租留守一線零售區個案

有老友同劉Sir講，麥當勞餐廳原來租用嘅尖沙咀彌敦道172至174號太平洋大廈地下及1樓舖位，業主舊年加租，間餐廳計過數之後，決定唔續租。

遷鄰街新舖 呎租77元

至於個舖加租幾多就唔知，不過，喜來登有個代理話，連鎖服裝店早排就以每月約90萬元租用上述舖位等，由於餐廳一早已經預咗要搬走，所以就轉租一街之隔嘅彌敦道184號地下至2樓，新舖面積約7,200方呎，同舊舖約1萬方呎少約20%，但人流差唔到幾遠。至於新租金約55萬元，呎租約77元，佢哋希望今年十一月前可進駐。

據了解，麥當勞餐廳依家喺區內大約有6間分店，最近上述新址喺金馬舖道分店，為滿足粉絲要求，唔使佢哋行咁遠，所以點都喺附近開番一間。

利園山道舖百萬續租

至於銅鑼灣一線街舖呎租雖然全球最貴，但無損連鎖店留守決心。聽市場消息講，由連鎖錶行租用多年嘅利園山道29至33號地下部分，早排以每月約100萬元續租，呎租達約1,250元，新租金較之前升約1倍。

另外，同區羅素街2000年廣場地下有兩個連鎖店商戶都續租，其中，由便利店租用約十年嘅地下雙號舖，面積約310方呎，剛以每月約60萬元續租，加幅料50%。至於另一間由甜品店租用嘅該廈地下部分，面積約1,400方呎，就以每月約50萬元續租，呎租約360元。