魚缸Blogger：中電信挑戰4.5元

雖然內地推動電訊資費改革，以此配合行業反壟斷工作，不過中國電信（00728）股價當佢無到，繼續落鑊慢火煎，尋日再升0.7%，收報4.13元，收復埋250日線4.11元，如果以六月低位3.48元計，至今累積升幅18%，有勢挑戰不對稱雙底頸線4.2元，唔大貪先睇4個半。

講吓賣點，中電信中績好過預期，上半年營業額增長14%至1,575億元（人民幣．下同），純利增長16%至102億元，移動用戶ARPU由52.4元升至54.3元。期內公司移動用戶增加8.6%至1.75億戶，其中佔比五成的3G用戶增加26.5%。為咗開拓即時通訊市場及增加收入，佢啱啱同網易合作搞易信，首日下載有成100萬次咁多。另外，近排新iPhone再成熱話，有消息指蘋果公司將於下周二舉行產品發布會，第二日就會移師北京，中電信有可能飲頭啖湯賣先，照計食住條水追得過。

中國電信（00728）