早兩星期，成個亞洲新興市場先至因為美國退市憂慮同熱錢撤離搞到無啖好食，誰不知個多星期後，氣氛已一百八十度轉變，中國官方PMI同滙豐PMI雙雙勝預期；南韓八月份出口數據升7.7%；配合近日亞洲多國貨幣大貶值，尋日聽到個buy side老友直言，認為依家亞洲好抵買，口風同早兩星期時完全轉晒。有時真係覺得基金經理同散戶分別唔大，好多時一兩個經濟消息加埋個市單邊行足幾日，睇法可以話變就變。

太陽日誌

綜合大行預測中海發展業績（人民幣）

前晚美股升96點，收14,930點，帶動港股升271點，報22,597點，今浪指數成分股表現，好過中型及二三線股，整體大市昨升跌股份比例57對43，同指數升幅唔多配合，短短幾日由低位挾千二點上嚟，好多人問挾倉挾到幾時？通常挾倉唔係挾到有人信，就係淡友投降出現終極一升先完，幾時好難講。

手機市場演泥漿摔角

值得一提，尋日個市成交654億，唔計周三建行（00939）配股，係八月十六日以來最多，大市沽空比率9.07%，係八月中以來最低，反映已經愈來愈多投資者站在睇好的一方，刻下如果期指未平倉合約數目由近日9.8萬張水平明顯回落，看官們就要小心。

過去四十八小時，三星、索尼及小米齊齊趕在蘋果公司之先發布下半年旗艦智能手機，九月十日輪到蘋果，估計會公布新一代iPhone5S及5C，智能手機的泥漿摔角即將展開。

以往蘋果出新機，首推往往無預中國份，今次情況有啲唔同，蘋果出埋中文邀請，九月十一日在北京同步發布，路邊社消息各有各傳，一陣話中電信（00728）會獨家代售，一陣話中移（00941）TD網兼容。早幾日見到網上流傳某北美大型連鎖超市價錢牌，顯示主攻中國等新興市場的iPhone5C賣449美金，計落成2,800元人仔，貴過小米3近800元人仔，依家中興（00763）、聯想（00992）同級產品亦唔使咁貴，5C的效應，最終可能心理作用大於實際。

講番股仔，前晚波羅的海乾散貨指數大升4%，至1,215點，環球貿易見底復甦，為市場上其中一個當炒概念，航運股衰咗咁耐，炒上值博率其實唔低。

中海發展（01138）上半年蝕9.49億人民幣，大行估計，明年最叻都係微蝕至收支平衡之間，不過股票係買將來而非過去，股價年初至今仲跌緊2.5%，以市帳率計得0.46倍，比○八年金融海嘯最惡劣時期的0.62倍仲低出兩成六，買佢純粹因為一個「殘」字，尋日啱啱破位，如果中國未來兩個月出口數據唔太離譜，股價挑戰年初高位5.28元應該唔過份。