香港地皮寸金尺土，中小型財團想爭贏大型發展商，就要尋求合作夥伴。好似剛批出嘅沙田市地段第579號嘅九肚豪宅地，中標財團俊和（00711）都話地皮以合資形式投得，集團佔權益少過一半，項目總投資額約48億元，計劃作洋房及分層住宅發展，未來亦傾向以合組財團形式投地。不過今次九肚項目合作夥伴仲係「一個謎」，話會喺適當時間先至會公布。

俊和地產發展潘志才表示，會在適當時候公布沙田九肚項目的合作夥伴。紅線內為俊和投得的沙田九肚豪宅地。

潘志才

俊和沙田九肚豪宅項目發展概念

尋日俊和（00711）就特登開記者會講佢哋用27.1億元買入嘅九肚豪宅地發展詳情。劉Sir本來以為佢哋會同時公開埋神秘合作夥伴嘅身份，但係俊和地產發展董事潘志才繼續「賣關子」，只係話會喺適當時候先至公布。佢話依家起樓建築費愈來愈貴，每年都升一成幾，未來都傾向同九肚一樣，傾向以合組財團形式投地，佔有權益都會少過一半。

佢話，啱啱投到嘅項目總投資額約莫48億元，當中約18億元為建築費，計番每方呎建築成本要約莫5,500元。而下個星期截標嘅同區市地段578號豪宅地，都唔排除會入標競投。

混合發展 兩年後預售

今次個項目會點發展，俊和話已有初步概念，公司經理（物業發展）梁志輝話，項目會以洋房及分層住宅混合式發展，樓面比例約為75%及25%，計劃提供約110個單位，包括70座約3層高洋房，每座面積約2,500至5,000方呎。另外有兩幢約10層高嘅分層住宅，提供及大約40個單位，每伙面積約1,700至2,500方呎，估計兩年後可以預售樓花，大概三年半後有機會落成。

指地皮多山坡價合理

對於市場認為地皮成交樓面呎價唔多理想，佢哋就有唔同見解，公司經理（物業發展）梁志輝話，成交價合理，事緣項目有較多山坡同護土牆問題，建築費及興建難度相對較高，而項目優勢係洋房比例較多。

其實俊和一直都有發展本港項目，劉Sir知道，好似最近佢哋入稟強拍嘅長沙灣永康街工廈項目。再講遠少少，○一年就投得港鐵彩虹站上蓋項目發展權，即係依家嘅清水灣道8號。