周二美股復市，升幅遠不及隔日亞洲時段期貨表現，而隔晚收市後三間公司宣布批股活動，亦都打窒港股氣氛。恒指昨日低開222點，最多跌251點，之後內地股市跌轉升，大市一度倒升43點，收市跌68點，報22,326點，主板成交689億元，當中包括批股上板，減去後其實同前日相差無幾。即月期指日間時段升10點，報22,325點，較除息後合理值22,245點足足高水80點。

恒指期貨走勢2013/9/4

由昨日即市所見，早市的低位22,065點，成為好友短期首道防線，睇淡的見破位可以小注試沽。經過昨日即市調整，過去幾日留低喺21,753至21,948點同22,240至22,290點的兩個上升裂口，後者已補回，今日不宜補埋第一個裂口，否則指數可能出現孤島掉頭訊號，不利後市。

今晚及明晚市場必定聚焦聯儲局褐皮書及八月就業數據，隔晚美債孳息一度高見2.91厘，後市係衝上3厘為股市帶來震盪，抑或數據令退市預期降溫，美股反彈，今明兩晚會有答案。