Fundman睇市：內銀股 無力破悶局

信義（00868）先舊後配1.2億股，今年股價累積升幅48%，經昨日一跌，往績市盈率回到21倍，加上半年業績升近1.1倍，估計一三年市盈率會番到13倍左右。睇番信義○六至○九年幾次配股集資，三次中有兩次接貨者都要捱一排先番到家鄉，看來管理層掌握時機極為準繩，趁今年升幅唔細攞錢，短期見咗高位的機會相當高。

大家或者有印象，淡馬錫一一年七月及去年五月減持中行（03988）及建行（00939），隨後個市立即腳軟，當日6元接建行揸住的話，大部分時間都要坐艇，值得股民參考。美銀美林把最後20億股建行清倉，近年該行出清非核心資產外，睇番○五年第一批股份成本價約每股1.06元，就算近兩年建行只能在5至6元之間浮浮沉沉，粉飾業績的誘因仲係好大，尤其近幾個月，全球市場深信美國經濟周期，比中、歐等地更早呈現復甦，套現番美國應該有更好發揮。

全世界話內銀股估值平絕地球，一三年PE僅5至5.5倍，但當日一班上市前已入股的策略股東，個個意興闌珊沽貨離場，剩低滙控（00005）及恒生（00011）依然高唱緊《中國夢》，揸住交行（03328）及興業銀行。今年正好係中國商業銀行股份制改革十周年，外資興趣大減，或多或少道出對銀行業改革進度及成績投下不信任票。

TCL多媒體受追捧

尋日TCL多媒體（01070）藉與百度合作推新產品的消息炒高一成，收報4.1元，成交1.52億元。顯然，市場一向以工業股看待傳統電視機製造股，估值唔高得去邊，但如今電視機生產商謀求跨行業發展，拓展三網融合商機，策略為市場受落，亦可為估值加添溢價，小股東當然樂見其成。同類股創維數碼（00751）尋日亦跟升，升幅3.8%，看來管理層亦要諗諗計變陣。

事實上，電視機由CRT發展到LED電視，已由單單追求機身夠「薄」同影音質量，發展至兼具上網及購物等「多功能」，傳統電視機製造商要控制成本得宜外，研發方面亦要與時並進，積極開發更多新電視功能，迎合市場發展需要，始可維持競爭力。