雙倍印花稅（DSD）於今年二月推出，工商舖炒家從此無運行。聽講就嚟上會嘅荃灣TML廣場同埋觀塘天星中心工廈樓花盤，早排已出現唔少蝕本或平手放售個案。其中TML廣場有高層單位，炒家開價約630萬元，比舊年底買入價平約70萬元，蝕住嚟放售摸貨。

觀塘天星中心頂層特色單位，呎價創全港最高，但現時有業主願平手離場。

新建工廈及銀座式商廈蝕讓及平手放盤個案

短期將會上會嘅荃灣TML廣場，近期屢錄蝕讓個案，部分單位半年帳面損失約85萬元，蝕幅約12%。

TML摸貨開價低一成

有代理同劉Sir講，依家該項目放盤約200個，唔少業主都願意蝕讓及平手離場，佔整體放盤約兩成。其中上述高層單位業主舊年底以約700萬元一手買入，依家開價約630萬元放摸貨，呎價只係約3,940元，比市價低超過一成，若以此價錢賣，帳面要蝕約70萬元。

舊年以樓花形式賣嘅觀塘天星中心，估計最快今個月上會，有接摸貨嘅尾班車炒家心急出貨。聽講有層全層單位，業主依家將叫價調低逾12%放售摸貨，意向價約3,876萬元，呎價約6,800元，同佢今年初入貨價差唔多。

金鑽璽投資者求打和

好多幢銀座式商廈喺舊年拆售都賣得好好，不過，市況回軟，唔少買家想棄購，其中，資本策略地產（00497）舊年底以確認身份拆售嘅旺角彌敦道703及705號金鑽璽，上個月已獲批入伙紙，點知有個高層單位錄終止買賣登記「贈興」。

代理話，因為咁令到有個揸住該廈全層嘅投資者減價200萬元速放單位，意向價約3,400萬元，比入貨價只係高5%唔夠，若買家再扭計議價，扣埋代理佣金等，估計實際只係平手離場。

至於宏安集團（01222）今年初拆售嘅旺角彌敦道724及726號銀座式商廈，雖然買家出年至要上會，但有心急業主已大劈價，其中一個全層業主開價約6,800萬元放售摸貨，比起入貨價只高約3%。