筆者確實低估市場對中國八月製造業PMI的反應，昨日大市開21,948點，好快升穿22,117點的阻力，十點前已見全日高位22,240點，之後橫行悶到收市，最後升443點，報22,175點，主板成交552億元，比上周五升近一成。

恒指期貨走勢

即月期指收22,156點，升588點，較合理值22,077點高水79點，乃八月中調整以來罕見。昨晚美股無市，期指好友選擇周一挾淡倉，仲要大高水收市，莫非好友有把握在今早再下一城？不過，基本上指數升勢於開市首半小時完成，而大市上升及下跌股份比例，只係54對46，稍高過五成，反映大戶托住幾隻重磅指數股，殺淡友一個措手不及。

百般不願，按計劃在指數高於22,117點收市先把手上淡倉止蝕。基於上述理由，對大市轉勢筆者仲係有所保留，要破壞八月營造的頭肩頂形態，大市至少要升穿八月二日的左肩高位22,291點，方可確認今次係真破位而非後抽。現時指數距離只有百餘點，應該好快會有答案。