美國是否出兵敍利亞，要等九月九日國會投票，展望本周四有聯儲局褐皮書，周五有美國就業數據，加埋尋晚美股休市，一心諗住尋日個市會靜，估唔到趁中國製造業PMI拗腰回升，個市反應咁大。

太陽日誌

保利協鑫中期業績

踏入九月第一個交易日，恒指勁升443點，收報22,175點，成交552億，上升股票710隻，下跌544隻，升跌比例大約1.3對1，反而藍籌46升3跌，卻極之一面倒，反映成分股表現尋日遠勝過中型及二三線股份。

尋日期指罕有地高水收市（計埋除息近98點後），大戶真係殺淡友殺得興起。睇番尋日亞洲其他股市，日股都只係升得1.37%，A股又唔多郁，港股無疑係最威，不過始終咁奀成交，大孖沙真係想開邊瓣就開邊瓣，但論到是否轉勢，似乎仲要睇多兩日至穩陣。

昨地產股表現標青，恒地（00012）升3.4%，新世界（00017）升3.1%，後者上周六推新盤「溱柏」238伙，兩日賣掉八成四，平均呎價8,345元，元朗去到呢個價其實唔平，消息話studio及一房最好賣，似乎雙倍印花稅辣招，對中產父母幫仔女置業的上車盤，衝擊較細，地產商值得借鏡，不妨諗諗將大呎數樓拆細變上車盤賣。今年地產股股價仲輸緊恒指幾條街，如果新盤唔係想像中咁滯銷，真係值得諗吓。

國家發改委公布首批光伏行業示範補貼，全國範圍內分散式光伏上網電價補貼標準，訂為0.42元（人民幣．下同）/千瓦時，較早前徵求意見文件中提及0.35元多出近兩成，以現時內地火電成本每度電大約0.4至0.5元，光伏發電大約0.9至1元。經過補貼，光伏行業總算有番一定市場競爭優勢，算係月初歐盟暫時唔向中國輸歐的光伏產品徵收47.8%反補貼稅（協議有效至一五年）後，另一利好消息。事實歐盟消耗內地五成以上光伏產品，一旦重手徵收反補貼稅，市場估超過三成內地光伏企業會因為過度投資要立即關門大吉。

光伏股好消息頻傳

常言道，股市比實際經濟或者企業營運走先兩至三季時間，股市看來也預計中歐貿易戰最終「大步檻過」，今年光伏股大都跑贏大市，即使早前業績後急跌，年初至今卡姆丹克（00712）股價仍累積54%升幅，保利協鑫（03800）升32.6%，興業太陽能（00750）升21%，唯獨去年勁蝕，上半年「蝕少咗」的陽光能源（00757）仍要跌26.4%。

上星期龍頭保利協鑫派半年成績表，蝕9.17億港元，核心業務毛利率見底，由6.1%回升至6.6%，上半年生產太陽能電池的主要原件多晶硅，產量達8,472公噸，較去年下半年升1.37倍，大行估計行業會進入緩慢復甦階段，圓晶加工成本一定要進一步控制得宜，保利協鑫明年才有機會虧轉盈，但講緊都係賺4至5億元左右，預期市盈率近70倍，現股價會唔會行得太前，見仁見智，但可見利好消息出得八八九九，短期值博率似乎唔係太高。