市建局觀塘市中心重建計劃內部分發展區好快就清場，該局亦同時加快餘下嘅收購。啱啱佢哋再下一城收購咗裕民坊國泰大樓地下一個銀行登記租用嘅巨舖，涉資逾2.78億元，聽講呎價圍起上嚟過6萬元，出手算幾進取。

觀塘市中心重建項目，進行得如火如荼，不少商戶已陸續遷出。（資料圖片）

觀塘重建區內大額收購個案

劉Sir根據土地註冊處資料睇到，位於觀塘道401、403及405號與裕民坊26、28、30及32號嘅國泰大樓地下A及B舖與低層地下A及B舖上個月錄買賣登記，涉資2.789億多元，買家係市建局；物業一一年時錄得銀行租賃登記，每月租金75萬元，租期為期三年。代理老友話，個單位總面積約莫4,500多方呎，即呎價約6.1萬元。

特津倍增 每戶逾十萬

觀塘市中心重建範圍內二十多個仁信里商戶，上個月市建局決定將特別津貼倍增至每戶超過10萬元，足見該局亦想加快收購進度。

近排唔少食店生意好旺，增強佢哋擴充信心。中原鄭得明話，喺筲箕灣道電車路旁開業半世紀嘅百利冰室，早排租用上環文咸東街柏廷坊高層地下一個地舖，吸中區OL客，作為首間分店，月租約16萬元，呎租大約38元。不過有消息話，去年首度來港嘅澳門特色食店，近期一口氣暫停中環等地區兩間分店運作。

信德中心貴市價7%租出

另外，美聯旺舖倫銘智話，有飲食集團睇好港鐵西港島線西環區後市，剛搶租吉席街61號地舖連1樓，月租約32萬元，呎租約29元，比起前租金大升逾1.1倍。

唔少內地演藝界名人都鍾意來港買物業收租，收到風其中有個內地演藝界名人就啱啱租出上環信德中心西翼一個中層單位，單位望全海，加上正升降機位，放租咗一年多，剛以每月近13.9萬元租出，呎租約56元，高市價約7%。美聯工商舖（00459）行政總裁黃漢成話，近排該公司舖位部及工業加埋cut咗4組，涉及人手30人。